قازاقستان پرەزيدەنتى 9 مامىردا رەسەيدە وتەتىن شەرۋگە قاتىسادى، دەپ حابارلايدى "ادىرنا" ۇلتتىق پورتالى. بۇل تۋرالى قازاقستان پرەزيدەنتىنىڭ ءباسپاسوز حاتشىسى رۋسلان جەلدىباي مالىمدەدى.
پرەزيدەنت قاسىم-جومارت توقاەۆ 9 مامىر كۇنى رەسەي باسشىسى ۆلاديمير ءپۋتيننىڭ شاقىرۋىمەن ۇلى وتان سوعىسىنداعى جەڭىستىڭ 78 جىلدىعىنا ارنالعان پارادقا قاتىسادى.
"پرەزيدەنت تۆەر وبلىسىنداعى رجەۆ مەموريالىنا بارىپ، 100-ءشى جانە 101-ءشى اتقىشتار ديۆيزيالارىنىڭ قۇرامىندا شايقاسىپ، قازا تاپقان قازاق جاۋىنگەرلەرىنىڭ رۋحىنا تاعزىم ەتەدى. رجەۆ شايقاسى ۇلى وتان سوعىسى كەزىندەگى ەڭ ءىرى ۇرىستاردىڭ ءبىرى سانالادى،"- دەپ جازدى ءباسپاسوز حاتشىسى.
سونىمەن قاتار مەملەكەت باسشىسى ترۋبينو دەرەۆنياسىنداعى باۋىرلاستار زيراتىنا بارادى. وندا پرەزيدەنتتىڭ اكەسىنىڭ اعاسى قاسىم بولتاەۆ جەرلەنگەن. رجەۆ تۇبىندەگى شايقاسقا قازاقستاننان 22 مىڭعا جۋىق سارباز بەن وفيتسەر قاتىستى.
بۇل شاراعا رەسەي تاراپى تمد-عا مۇشە ەلدەردىڭ باسشىلارىن شاقىرعان. قازىرگە دەيىن بۇل شەرۋگە ورتالىق ازيا ەلدەرىنەن قازاقستاننان باسقا قىرعىزستان مەن تاجىكستاننىڭ پرەزيدەنتتەرى دە قاتىساتىنى بەلگىلى بولدى.
"ادىرنا" ۇلتتىق پورتالى
