بۇگىن، 2 جەلتوقساندا «ماڭعىستاۋمۇنايگاز» اكتسيونەرلىك قوعامى جوعارى بۋىن جانە بولىمشەلەر باسشىلارىن روتاتسيالاۋ جۇزەگە اسقانىن مالىمدەدى. ديرەكتورلار كەڭەسىنىڭ شەشىمىمەن كومپانيانىڭ باس ديرەكتورى بولىپ ۆەن تسزياتسزيۋن تاعايىندالدى، دەپ حابارلايدى «ادىرنا» ءتىلشىسى.
ۆەن تسزياتسزيۋن 1978 جىلى 19 قىركۇيەكتە قىتايدا تۋعان. ي.م. گۋبكين اتىنداعى رەسەي مەملەكەتتىك مۇناي جانە گاز ۋنيۆەرسيتەتىندە ءبىلىم العان. ەڭبەك جولىن 2005 جىلى «CNDOC» كومپانياسىنىڭ وندىرىستىك-تەحنيكالىق ءبولىم ينجەنەرى بولىپ باستاعان.
2005-2024 جىلدار ارالىعىندا «سنپس-اي دان مۇناي» اق-دا ەڭبەك ەتىپ، جەتەكشى سۋپەرۆايزەردەن كومپانيا پرەزيدەنتىنە دەيىن كوتەرىلگەن.
2024 جىلدىڭ مامىرىنان 2024 جىلدىڭ جەلتوقسانىنا دەيىن ممگ باس ديرەكتورىنىڭ ءبىرىنشى ورىنباسارى قىزمەتىن اتقاردى.
ودان بولەك، «ماڭعىستاۋمۇنايگاز» اق باس ديرەكتورىنىڭ ءبىرىنشى ورىنباسارى بولىپ بولات سەيتماعانبەتوۆ تاعايىندالدى.
1971 جىلى 12 اقپاندا ماڭعىستاۋ اۋدانىنىڭ تۇششىقۇدىق اۋىلىندا دۇنيەگە كەلگەن. ول قازاق پوليتەحنيكالىق ينستيتۋتىن «مۇناي جانە گاز كەن ورىندارىن يگەرۋ جانە پايدالانۋ» ماماندىعى بويىنشا، الماتى مەنەدجمەنت ۋنيۆەرسيتەتىن (ىسكەرلىك اكىمشىلىك ماگيسترى) بىتىرگەن.
ەڭبەك جولىن 1993 جىلى «قالامقاسمۇنايگاز» وندىرىستىك باسقارماسىندا مۇناي جانە گاز ءوندىرۋ وپەراتورى بولىپ باستاعان. بۇل مەكەمەدە ءار جىلدارى ينجەنەر-تەحنولوگ، جەتەكشى ينجەنەر، تسەح باستىعى، وندىرىستىك باسقارما باستىعى بولىپ جۇمىس ىستەگەن. 2022 جىلدىڭ اقپانىنان 2024 جىلدىڭ جەلتوقسانىنا دەيىن «ماڭعىستاۋمۇنايگاز» اق «جەتىبايمۇنايگاز» وندىرىستىك باسقارماسىنىڭ باستىعى قىزمەتىن اتقاردى.
