گرۋزيا استاناسى تبيليسيدە 4 كۇن ىشىندە شەرۋگە شىققان 224 ادام ۇستالدى. بۇل تۋرالى بۇگىن، 2 جەلتوقساندا ەلدىڭ ىشكى ىستەر مينيسترلىگى ايتتى، دەپ حابارلايدى «ادىرنا» ءتىلشىسى.
دەمونسترانتتار ەۋرووداققا قوسىلۋ تۋرالى كەلىسسوزدەردى توقتاتقان ۇكىمەتكە نارازىلىق ءبىلدىرىپ وتىر. ولار تبيليسي ورتالىعىنداعى رۋستاۆەلي جانە كوستاۆا داڭعىلىن جاۋىپ تاستاعان بولاتىن.
ۇستالعان ازاماتتار ۇساق بۇزاقىلىق جاسادى دەپ ايىپتالۋدا. سوت قازىردىڭ وزىندە 36 ادامعا ايىپپۇل سالدى، تاعى 34 ادام اكىمشىلىك قاماۋعا الىندى. ال سوتقا بارلىعى 98 ادامعا قاتىستى ماتەريال كەلىپ ءتۇستى.
پوليتسيانىڭ مالىمەتىنشە، تارتىپسىزدىك سالدارىنان ىشكى ىستەر مينيسترلىگىنىڭ 113 قىزمەتكەرى زارداپ شەككەن. ولاردىڭ تورتەۋى اۋرۋحاناعا جاتقىزىلدى.
ايتا كەتەيىك، گرۋزيا ۇكىمەتى 28 قاراشادا ەۋرووداققا قوسىلۋ تۋرالى كەلىسسوزدى 4 جىل مەرزىمگە توقتاتا تۇرۋدى ۇيعارعانىن حابارلاعان. بۇل شەشىم كوپشىلىككە ۇنامادى. تبيليسيدەگى شەرۋلەر بارىسىندا شەرۋشىلەر مەن پوليتسيا اراسىندا قاقتىعىس ءورشىپ، جاعداي ۋشىعا ءتۇستى.
