قازاقستاندىق ءانشى ديماش قۇدايبەرگەن ايەلدەرگە كۇش كورسەتىپ، قول كوتەرەتىن ەر ازاماتتاردى قاتاڭ سىنعا الدى، دەپ حابارلايدى "ادىرنا" ۇلتتىق پورتالى.
ونەر يەسى بۇل تۋرالى الەۋمەتتىك جەلىدەگى پاراقشاسىندا جازدى.
ءانشى ايەلگە كۇش كورسەتۋدى ەر ازاماتقا ابىروي اكەلەتىن ارەكەت دەپ ساناۋعا بولمايتىنىن اتاپ ءوتتى. ونىڭ پىكىرىنشە، ءالسىز ادامعا الىمجەتتىك جاساۋ ەرلىككە جاتپايدى.
«ايەلدى ساباپ، سونى ماقتانىش كورەتىندەر، قاي بەتتەرىڭمەن وزدەرىڭدى ەركەكپىن دەپ جۇرسىڭدەر؟! جۇدىرىقتارىڭ ايەلگە عانا جۇرەتىن بولسا، سەندەر ەركەك ەمەس – مالسىڭدار بولدى. ايەلگە الىمجەتتىك جاساپ ابىروي جينايمىن دەۋ – ادامدىقتىڭ ەڭ تومەنگى شەگى!» – دەپ جازدى ءانشى.
ونەر يەسى وسىلايشا قوعامدا ايەلدەرگە قاتىستى زورلىق-زومبىلىققا جول بەرمەۋ قاجەتتىگىن ايتىپ، مۇنداي ارەكەتتەردى اقتاۋعا بولمايتىنىن جەتكىزدى.
