الاشتانۋشى عالىم مامبەت قويگەلدى 80 جاسقا تولدى، دەپ حابارلايدى "ادىرنا" ءتىلشىسى.
بەلگىلى الاشتانۋشى عالىم، اكادەميك، تاريح عىلىمدارىنىڭ دوكتورى، پروفەسسور مامبەت قويگەلدى بۇگىن 80 جاسقا تولدى.
مامبەت قويگەلدى قىرعىز مەملەكەتتىك ۋنيۆەرسيتەتىن ءتامامداپ، ءال-فارابي اتىنداعى قازاق ۇلتتىق ۋنيۆەرسيتەتىنىڭ اسپيرانتۋراسىندا ءبىلىم العان. عالىم ەڭبەك جولىن اۋىل مەكتەبىندە مۇعالىم جانە جامبىل وبلىستىق مۇراعاتىنىڭ عىلىمي قىزمەتكەرى بولىپ باستاعان. كەيىن ءال-فارابي اتىنداعى قازۇۋ-دا دوتسەنت، كافەدرا مەڭگەرۋشىسى، بىلىكتىلىكتى ارتتىرۋ ينستيتۋتىنىڭ ديرەكتورى جانە تاريح فاكۋلتەتىنىڭ دەكانى قىزمەتتەرىن اتقاردى.
سونىمەن قاتار ول قازاقستان كومپارتياسى ورتالىق كوميتەتى جانىنداعى پارتيا تاريحى ينستيتۋتىندا اعا عىلىمي قىزمەتكەر، قر عىلىم جانە ءبىلىم مينيسترلىگى ش. ءۋاليحانوۆ اتىنداعى تاريح جانە ەتنولوگيا ينستيتۋتىنىڭ ديرەكتورى، اباي اتىنداعى قازۇپۋ-دا كافەدرا مەڭگەرۋشىسى بولىپ ەڭبەك ەتتى. مامبەت قويگەلدى 2004 جىلدان بەرى قازاقستان تاريحشىلارى قاۋىمداستىعىنىڭ پرەزيدەنتى قىزمەتىن اتقارىپ كەلەدى. سونداي-اق عالىم «مادەني مۇرا» مەملەكەتتىك باعدارلاماسىنىڭ تاريح جانە ەتنوگرافيا سەكتسياسىنا جەتەكشىلىك ەتكەن.
عالىمنىڭ عىلىمي زەرتتەۋلەرىنىڭ نەگىزگى باعىتتارىنىڭ ءبىرى – XX عاسىردىڭ العاشقى شيرەگىندەگى قازاق زيالىلارىنىڭ قوعامدىق-ساياسي قىزمەتى. ول الاش قوزعالىسىن زەرتتەۋگە ەلەۋلى ۇلەس قوسىپ، وتاندىق تاريح عىلىمىندا الاش تاريحىنا قاتىستى جاڭا عىلىمي تۇجىرىمداردىڭ قالىپتاسۋىنا ىقپال ەتتى. سونىمەن قاتار مامبەت قويگەلدى ورتاعاسىرلىق تاريحشى، جىلناماشى قادىرعالي قوسىمۇلىنىڭ «جىلنامالار جيناعى» ەڭبەگىنىڭ تاريحي جازبا ءداستۇرى نەگىزىندە دۇنيەگە كەلگەن قۇندى مۇرا ەكەنىن عىلىمي تۇرعىدان نەگىزدەدى.
