قىرعىزستاننىڭ باتكەن اۋدانىنداعى انديگەن جايلاۋىندا I–II عاسىرلارعا جاتاتىن تاريحي ەسكەرتكىشتەرگە ارحەولوگيالىق قازبا جۇمىستارى جالعاسىپ جاتىر. بۇل تۋرالى باتكەن اۋداندىق ىشكى ىستەر ءبولىمى ايتتى، دەپ حابارلايدى «ادىرنا» ءتىلشىسى.
پوليتسيا مالىمەتىنشە، قازبا جۇمىستارى عۇنداردىڭ جەرلەۋ ورىندارى ورنالاسقان تاريحي-ارحەولوگيالىق ەسكەرتكىشتەرى بار سامارقاندەك اۋىلدىق ايماعىندا جۇرگىزىلۋدە.
سامارقاندەك پوليتسيا بولىمشەسىنىڭ قىزمەتكەرلەرى ارحەولوگيالىق ەكسپەديتسيا مۇشەلەرىمەن پروفيلاكتيكالىق كەزدەسۋ وتكىزىپ، ءوزارا قۇقىقتاردى قۇرمەتتەۋ، قۇقىق بۇزۋشىلىقتارعا جول بەرمەۋ جانە قاۋىپسىزدىك تالاپتارىن ساقتاۋ قاجەتتىگىن ءتۇسىندىردى. سونداي-اق تاۋلى ايماقتا ءجۇرۋ ەرەجەلەرىنە ەرەكشە نازار اۋدارىلىپ، قاۋىپتى اۋماقتارعا بارماۋ كەرەكتىگى ەسكەرتىلدى.
قازىرگى ۋاقىتتا ارحەولوگيالىق توپ قۇرامىندا 28 ادام جۇمىس ىستەپ جاتىر. ونىڭ تورتەۋى — جەرگىلىكتى تۇرعىندار، ال قالعاندارى – باتكەن مەملەكەتتىك ۋنيۆەرسيتەتىنىڭ، جالال-اباد مەملەكەتتىك ۋنيۆەرسيتەتىنىڭ جانە وش مەملەكەتتىك ۋنيۆەرسيتەتىنىڭ ستۋدەنتتەرى. ارحەولوگيالىق قازبا جۇمىستارىنا عالىم حاديشا تاشباەۆا جەتەكشىلىك ەتەدى.
