سيريادا باشار اساد رەجيمىنە قارسى قارۋلى وپپوزيتسيا توپتارى مەن ۇكىمەت كۇشتەرى اراسىندا قارۋلى قاقتىعىستار جالعاسۋدا، دەپ حابارلايدى "ادىرنا" ۇلتتىق پورتالى Anadolu Ajansı اگەنتتىگىنە سىلتەپ.
ءۇش كۇنگە سوزىلعان شايقاستار بارىسىندا وپپوزيتسيا توپتارى الەپپو جانە يدليب پروۆينتسيالارىندا كەمىندە 70 ەلدى مەكەندى ءوز باقىلاۋىنا العان.
27 قاراشادا الەپپونىڭ باتىسىنداعى ۇكىمەت اسكەرلەرى مەن قارۋلى توپتار اراسىندا قاقتىعىستار باستالىپ، قارۋلى وپپوزيتسيا كۇشتەرى الەپپو قالاسىنىڭ ورتالىق اۋداندارىنا دەيىن جەتتى. ولار كەشكە قاراي قالا ورتالىعىنداعى ساداللا ءال-دجابيري الاڭىنا كىرگەن.
كوتەرىلىسشىلەر الەپپو پروۆينتسياسىنداعى ۇكىمەت باقىلاۋىنداعى ايماقتارعا كەڭ اۋقىمدى شابۋىل جاسادى. سونىڭ سالدارىنان 130 ادام قازا تاپتى. قاقتىعىستار اسىرەسە الەپپو مەن يدليب اۋماقتارىندا كۇشەيىپ، ەلدىڭ سولتۇستىك-باتىس بولىگىندەگى تۇراقسىزدىقتى تەرەڭدەتىپ وتىر.
ءۇش كۇنگە سوزىلعان قاقتىعىستار ايماقتاعى گۋمانيتارلىق جاعدايدى ودان ءارى ناشارلاتىپ، بەيبىت تۇرعىنداردىڭ قاۋىپسىزدىگىنە قاتەر ءتوندىردى. بۇل جاعداي حالىقارالىق قاۋىمداستىقتىڭ نازارىن قايتادان سيرياداعى شيەلەنىس پەن ونىڭ سالدارىنا اۋدارۋدا.
