2019 جىلدىڭ 7 قىركۇيەك كۇنى الماتى قالاسىندا قۇرلىق اسكەرلەرى اسكەري ينستيتۋتىندا 1 كۋرس كۋرسانتتارى سالتاناتتى تۇردە اسكەري انت قابىلدادى.
سالتاناتتى شاراعا قازاقستان رەسپۋبليكاسىنىڭ قارۋلى كۇشتەرىنىڭ قۇرلىق اسكەرلەرىنىڭ باسشىلىعى، ۇلى وتان سوعىسىنىڭ جانە قارۋلى كۇشتەرىنىڭ ارداگەرلەرى، كۋرسانتتاردىڭ اتا-انالارى مەن تۋعان-تۋىستارى قاتىستى.
ەر جىگىتتىڭ ومىرىندە ءبىر-اق رەت قايتالانار انت قابىلداۋ ءراسىمى اسكەري داستۇرلەردىڭ ىشىندەگى ەرەكشەسى بولىپ سانالادى.
اسكەري انت قابىلداعان كۇن اسكەري ينستيتۋتتىڭ ساپ قاتارىن تولىقتىرعان ءاربىر جاس كۋرسانتتىڭ ومىرىندە ەرەكشە ورىن الاتىن ماڭىزدى شارا. بۇل كۇن كۋرسانتتاردىڭ ماڭگىلىك ەسىندە قالادى.
بولاشاق وفيتسەرلەردىڭ ومىرىندە ۇمىتىلماس وسى سالتاناتتى قۇرلىق اسكەرلەرى اسكەري ينستيتۋتىنىڭ باستىعىنىڭ مىندەتىن ۋاقىتشا اتقاراتىن پولكوۆنيك تالعات باۋدينوۆ قىسقاشا كىرىسپە سوزبەن اشتى.
ساپ تۇزەگەن الاڭدى بويلاي اسكەري ينستيتۋتتىڭ جاۋىنگەرلىك تۋى سالتاناتتى تۇردە الىپ وتىلگەننەن كەيىن قازاقستاننىڭ مەملەكەتتىك ءانۇرانى شىرقالدى.
انە-مىنە دەگەنشە، قاۋمالاعان جۇرتشىلىق تاعاتسىزدانا كۇتكەن ءسات تە كەلىپ جەتتى.
مۇنتازداي كيىنىپ، يىقتارىنا قارۋلارىن اسىنعان جاس كۋرسانتتار ساپتان نىق قاداممەن العا سۋىرىلىپ شىعىپ، بىرىنەن سوڭ ءبىرى اسكەري انت قابىلدادى. اسكەري كيىمدەگى بالالارىن كورىپ، ءماز-مەيرام بولىسقان جۇرشىلىقتا جاس وتان قورعاۋشىلاردىڭ جىگەرلى داۋىستارىنا تولعانا قۇلاق تۇرگەن.
ينستيتۋتتىڭ ساپتىق الاڭىندا بولاشاق وفيتسەرلەر بىرىنەن كەيىن ءبىرى وتان الدىندا وزدەرىنە جۇكتەلگەن مىندەتتەردى ءمىنسىز ورىنداۋعا، قيىنشىلىقتاردى تاباندىلىقپەن كوتەرۋگە، اسكەري ءىستى وقىپ ۇيرەنۋگە انت ەتتى.
ايتۋلى شارانىڭ رەسمي ءبولىمى اياقتالعان سوڭ، مىنبەدەن قازاقستان رەسپۋبليكاسىنىڭ قارۋلى كۇشتەرىنىڭ قۇرلىق اسكەرلەرىنىڭ باس قولباسشىسىنىڭ ورىنباسارى-شتاب باستىعى گەنەرال-مايور تالعات قويباقوۆ، ارداگەرلەر بولاشاق وفيتسەرلەردى ۇمىتىلماس كۇندەرىمەن قۇتتىقتادى جانە الداعى وقۋلارىندا تولاعاي تابىستار تىلەدى.
-انت دەگەنىمىز ء–ار جاۋىنگەر ءۇشىن ءومىر زاڭى. ونىڭ ءار ءسوزى جاۋىنگەردى ۇنەمى بيىك جاۋاپكەرشىلىككە، وتان ءۇشىن، ەل ءۇشىن اسكەري پارازىن ورىنداۋعا شاقىرادى، دەيدى ينستيتۋتتىڭ باستىعىنىڭ تاربيە جانە يدەولوگيالىق جۇمىستار جونىندەگى ورىنباسارى پولكوۆنيك جۇمابەك حاسەنوۆ.
انت قابىلداۋ راسىمىنەن كەيىن رەسپۋبليكامىزدىڭ تۇكپىر-تۇكپىرىنەن ات تەرلەتىپ كەلگەن كۋرسانتتاردىڭ اتا-انالارى ينستيتۋتتتىڭ الەۋمەتتىك تۇرمىسىمەن، وقۋ بازاسىمەن ، تىنىس تىرشىلىگىمەن جاقىنىراق تانىستى.
بيىلعى جىلى قۇرلىق اسكەرلەرى اسكەري ينستيتۋتىنىڭ كۋرسانتى اتاعىنا 300 جۋىق كۋرسانت يە بولدى.
ايدا بەكتۋروۆا
قۇرلىق اسكەرلەرىنىڭ اسكەري ينستيتۋتىنىڭ ءباسپاسوز قىزمەتى
