مىسىردىڭ مارسا-ەل-الام قالاسى ماڭىندا 45 ادام مىنگەن Sea Story ياحتاسى تەڭىزگە باتىپ كەتتى. بورتتا 14 ەكيپاج مۇشەسى مەن 31 تۋريست بولعان، دەپ حابارلايدى «ادىرنا» ءتىلشىسى.
اپات تىركەلگەن پروۆينتسيا گۋبەرناتورى امير حانافيدىڭ ايتۋىنشا، جەدەل توپ 28 ادامدى قۇتقارىپ ۇلگەرگەن. قازىرگى تاڭدا ءىز-ءتۇزسىز جوعالعان 17 ادام ىزدەستىرىلىپ جاتىر.
«كەمەنىڭ اپاتقا ۇشىراعانى تۋرالى حابارلاما دۇيسەنبى كۇنى تاڭەرتەڭ ءتۇستى. ىزدەستىرۋ-قۇتقارۋ جۇمىستارى ەگيپەت اسكەري-تەڭىز كۇشتەرى مەن اسكەري-اۋە كۇشتەرىنىڭ قاتىسۋىمەن جۇرگىزىلىپ جاتىر»،—دەپ ءتۇسىندىردى جەرگىلىكتى بيلىك.
ريا نوۆوستيءدىڭ مالىمەتىنشە، تۋريستىك كەمە بورتىندا مىسىر، گەرمانيا، يسپانيا، بەلگيا، قىتاي، اقش، سلوۆاكيا، شۆەيتساريا، ۇلىبريتانيا، پولشا، نورۆەگيا، يرلانديا جانە فينليانديا ازاماتتارى بولعان.
ايتا كەتەيىك، ياحتا 24 قاراشادا جولعا شىعىپ، 29 قاراشا كۇنى حۋرگادا-ماريناعا ورالۋى كەرەك ەدى. قازىرگى تاڭدا اپاتتىڭ سەبەپتەرى انىقتالىپ جاتىر.
