ۇلتتىق قاۋىپسىزدىك كوميتەتى ءۇش وبلىستاعى قىلمىستىق-اتقارۋ جۇيەسى مەكەمەلەرىندە 10 راديكالدى ءدىني يدەولوگيا جاقتاسىنىڭ زاڭسىز ارەكەتىنىڭ جولىن كەستى. بۇل تۋرالى بۇگىن ۇقك ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
بەلگىلى بولعانداي، قاماۋدا وتىرعان فيگۋرانتتاردىڭ ءبىرى تەرراكت جاساۋعا دايىندالعان، ال قالعاندارى تەرروريزمدى ناسيحاتتاۋعا قاتىسىپ، تەررورلىق ارەكەتتەردى ۇيىمداستىرۋ ماقساتىندا ادامداردى ءوز قاتارلارىنا تارتۋمەن اينالىسقان.
«جازا وتەۋ ورىندارىندا جۇرگىزىلگەن تىنتۋلەر بارىسىندا سۋىق قارۋ، سمارتفوندار جانە باسقا دا زاتتاي دالەلدەر الىندى. بىرەۋىنىڭ ەكسترەميزم ءۇشىن سوتتىلىعى بار. قالعاندارى كىسى ءولتىرۋ، توناۋ جانە ۇرلىق ءۇشىن جازالارىن وتەگەن. سونداي-اق، الماتى قالاسىندا پروباتسيالىق باقىلاۋدا تۇرعان ولاردىڭ بايلانىسى ۇستالدى»،—دەلىنگەن حابارلامادا.
كوميتەتتىڭ ءباسپاسوز قىزمەتىنىڭ مالىمەتىنشە، جوعارىدا اتالعان ادامدارعا قاتىستى قىلمىستىق كودەكستىڭ 255, 256 جانە 259-باپتارى بويىنشا سوتقا دەيىنگى تەرگەپ-تەكسەرۋ جۇرگىزىلۋدە. قىلمىستىق-پروتسەستىك كودەكستىڭ 201-بابىنىڭ 1-بولىگىنە سايكەس وزگە اقپارات جاريا ەتىلمەيدى.
