تامىز ايىنىڭ باسىندا جەتىسۋ وبلىسى اقسۋ اۋىلىنىڭ تۇرعىنى اكىم ءتۇن جارىمدا ۇيىمە تەرەزەدەن كىرىپ، زورلىق كورسەتپەك بولدى دەگەن مالىمدەمە جاساعان ەدى. 18 قاراشادا قىلمىستىق ءىس اۋداندىق سوتتا قارالىپ، ايىپتالۋشى اۋىل اكىمى مەن اكىمدىك قىزمەتكەرىنە ۇكىم شىقتى، دەپ حابارلايدى «ادىرنا» ءتىلشىسى.
ولار تۇرعىن ۇيگە توپ بولىپ تۇنگى ۋاقىتتا زاڭسىز كىرۋ جانە ەلدىڭ تىنىشتىعىن بۇزۋ بابى (قك 149-بابىنىڭ 2-بولىگى) بويىنشا ايىپتالعان.
سوتتا جينالعان دالەلدەر، جابىرلەنۋشىنىڭ جانە كۋاگەرلەردىڭ ايعاقتارى، سونداي-اق ءىستىڭ باسقا دا ماتەريالدارى نەگىزىندە ايىپتالۋشىلاردىڭ كىناسى دالەلدەندى.
«سوتتالۋشىلاردىڭ بۇرىن سوتتالماعانى جانە كامەلەتكە تولماعان بالالارىنىڭ بارى ەسكەرىلدى. ولار تاعىلعان ايىپتار بويىنشا كىنالى دەپ تانىلىپ، ارقايسىسىنا 1 جىل مەرزىمگە باس بوستاندىعىن شەكتەۋ جازاسى تاعايىندالدى. ۇكىم زاڭدى كۇشىنە ەنگەن جوق»،— دەلىنگەن حابارلامادا.
بۇعان دەيىن اقسۋ اۋىلدىق وكرۋگىنىڭ اكىمى ايەلدىڭ ايتقانىمەن مۇلدەم كەلىسپەيتىنىن جەتكىزگەن ەدى.
