مي-8 ۇلگىسىندەگى قر قك اۋە قورعانىسى كۇشتەرىنىڭ تىكۇشاقتارى 1986-2019 جىلدار ارالىعىندا جاسالعان. ولاردىڭ ورتاشا ەسەپپەن العانداعى جاسى – 22 جىل 9 اي. بۇل تۋرالى قورعانىس ءمينيسترىنىڭ ورىنباسارى شايح-حاسان جازىقباەۆ Ulysmedia.kz پورتالىنا ايتتى، دەپ حابارلايدى «ادىرنا» ءتىلشىسى.
«ءبىر تىكۇشاق اپاتىنان ەكونوميكاعا قانشا شىعىن كەلەدى، ولاردىڭ نارىقتىق قۇنى قانشاعا باعالانادى» دەگەن ساۋالعا مينيسترلىك «اۋە كەمەسىن جوعالتۋ كەزىندەگى شىعىندار ونىڭ وقيعا كەزىندەگى قالعان قۇنىنا بايلانىستى» دەپ قىسقا قايىردى.
شىن مانىندە تىك ۇشاق اپاتىنىڭ ناقتى شىعىنىن ەسەپتەۋ كۇردەلى زەرتتەۋدى قاجەت ەتەدى ءار ول ارنايى ماماندارعا عانا قولجەتىمدى اقپاراتتار نەگىزىندە جۇزەگە اسۋى مۇمكىن.
دەسە دە، اشىق دەرەككوزدەردەگى اقپاراتتارعا قاراپ، اپاتتىڭ ەكونوميكالىق سالدارى ميلليون دوللاردان اسىپ كەتۋى مۇمكىن دەپ تۇجىرىمداۋعا نەگىز بار. تىكۇشاقتىڭ باعاسى ونىڭ جىلىنا، موديفيكاتسياسىنا، جاعدايىنا، جابدىقتالۋىنا جانە ساتىپ الۋ شارتتارىنا بايلانىستى وزگەرۋى مۇمكىن.
ادەتتە جاڭا مي-8 تىكۇشاقتاردىڭ باعاسى 5-15 ميلليون دوللار ارالىعىندا بولادى. بىزدەگى تىكۇشاقتارىڭ ورتاشا جاسى 23 جاسقا تاياپ قالعانىن ەسكەرسەك، ونىڭ نارىقتىق قۇنى بۇدان الدەقايدا تومەن بولۋى مۇمكىن.
تىكۇشاق قىمبات اسكەري تەحنيكا بولعاندىقتان، وتاندىق قورعانىس سالاسىندا ونى جىلدا جاڭالاۋعا شاما جوق. قورعانىس كۇشتەرى سوڭعى رەت وسىدان 4 جىل بۇرىن ياعني 2020 جىلى مي-35م تىكۇشاقتارىمەن تولىقتىرىلعان. مينيسترلىك ولاردىڭ ناقتى سانىن اتامادى.
ال “الداعى ۋاقىتتا قورعانىس مينيسترلىگىنە جاڭا تىكۇشاقتار ساتىپ الۋ جوسپاردا بار ما” دەگەن ساۋالىمىزعا “تىكۇشاق پاركىن جاڭارتۋ قاراستىرۋدا” دەگەن جالپىلاما جاۋاپ الدىق. تەك بيىل يسپانيادان ءبىر اۋىر ا400م ۇشاعى جەتكىزىلەدى دەپ كۇتىلىپ وتىرعانىن ناقتىلادى.
ودان بولەك مينيسترلىك اۋە قورعانىسى سالاسىن كۇشەيتۋ ماقساتىندا رەسەيدەن، تور-م2 جانە بۋك-م2ە زەنيتتىك زىمىران كەشەندەرىن، بەلارۋستە وندىرگەن “”روسا-ر”» رلك راديولوكاتسيالىق كەشەنىن، قازاقستان مەن فرانتسيا بىرلەسكەن وندىرگەن GM-403 “نۇر” راديولوكاتسيالىق ستانتسياسىن العانىن اتاپ ءوتتى. الايدا بۇل اسكەري قۇرالدار الدى ءۇش، ارتى بەس جىل بۇرىن ساتىپ الىنعان.
