اقمولا وبلىسىنىڭ سابىندى اۋىلىندا بۇرىنعى مەشىتتە گاز جارىلىسىنان ءۇش ادام قازا تاپتى، دەپ حابارلايدى "ادىرنا" ۇلتتىق پورتالى.
عيماراتتا اس بەرۋ ءراسىمى ءوتىپ جاتقان.
وبلىستىق تجد مالىمەتىنشە، جارىلىس گاز-اۋا قوسپاسىنىڭ جارىلۋى ناتيجەسىندە ورىن الىپ، ورتەنۋسىز عيماراتتىڭ قۇلاۋى بولعان.
"ناتيجەسىندە 1978 جىلى تۋعان ەر ادام قازا تاپتى. قۇتقارۋشىلار 1983 جىلعى ايەل مەن 2012 جىلعى بالانىڭ دەنەلەرىن تاپتى. 16 ادام استانا قالاسىنىڭ قالالىق اۋرۋحاناسىنا جەتكىزىلدى", - دەپ حابارلادى قر تجم.
سونىمەن قاتار، قۇتقارۋشىلار عيماراتتان جەتى گاز باللوننىڭ التاۋىن شىعاردى.
"قازىرگى ۋاقىتتا ۇيىندىلەردى تازالاۋ جۇمىستارى جالعاسۋدا. وقيعا ورنىندا وبلىستىق تجد-ءنىڭ 30-عا جۋىق جەكە قۇرام مۇشەسى مەن بەس تەحنيكا بىرلىگى، سونداي-اق، جەدەل قۇتقارۋ جاساعى، اپاتتار مەديتسيناسى ورتالىعىنىڭ پسيحولوگتارى مەن استانا قالاسىنىڭ كينولوگيالىق قىزمەتى جۇمىس ىستەۋدە", - دەپ مالىمدەدى تجم.
جارىلىستىڭ سەبەبى اقمولا وبلىسى مەن استانا قالاسىنىڭ تجد-ءنىڭ زەرتتەۋ سىناق ءورت زەرتحاناسى ارقىلى انىقتالادى.
