اقتوبە وبلىسىندا تەحنيكالىق اقاۋ شىعىپ، جانىپ كەتكەن تىكۇشاق اپاتىنا قاتىستى جاڭا دەرەكتەر بەلگىلى بولدى، دەپ حابارلايدى “ادىرنا” ۇلتتىق پورتالى.
وقيعا كۋاگەرلەرىنىڭ ايتۋىنشا، ۇشقىش اسكەري تىكۇشاقتى قاۋىپسىز جەرگە قوندىرماق بولعان. سولاي اۋىلدىڭ ءۇستىن اينالا ۇشىپتى.
ال اۋىل سىرتىنا قۇلاعان تىكۇشاقتى ءبىرىنشى بولىپ، اۋىل شارۋاشىلىق جارمەڭكەسىنەن قايتقان اكىمدىك قىزمەتكەرلەرى بايقاعان. مارتوك اۋداندىق اۋىل شارۋاشىلىق ءبولىمىنىڭ باسشىسى باقىتجان مۋلكاەۆ وقيعانىڭ ءمان-جايىن ايتىپ بەردى.
“بۇگىن اۋداندا اۋىل شارۋاشىلىق جارمەڭكەسى بولدى. قايتار جولدا وسى وقيعانى كوردىك. قاسىمدا اۋداندىق ءماسليحات توراعاسى بولدى. بىردەن 112-گە جانە جەدەل جاردەم قىزمەتىنە حابار بەردىك. ول جەردە ويلانىپ تۇراتىن ۋاقىت بولعان جوق. سەبەبى تىكۇشاقتىڭ قاسىندا ەكى ادام جاتتى. بىرەۋى قولىن بۇلعادى. شاماسى قۇلاعان كەزدە ىشىندە بولعانداردى سىرتقا لاقتىرىپ جىبەرسە كەرەك. كولىكتى الىسقا تاستاپ، جاياۋلاپ جەتتىك. بىرەۋى ەسىن بىلمەيدى، ەكىنشىسى “باتىر قالىپ قويدى” دەپ سويلەپ جاتتى. تىكۇشاق جانىپ جاتقاندىقتان بىزگە وعان كىرۋ مۇمكىندىگى بولمادى. ەكەۋىن سۇيرەلەپ الىستاتقاندا “تارس” ەتىپ اتىلدى. ەكەۋىنىڭ دەنەسىندە كۇيىك جوق. جەرگە سوققان كەزدە لاقتىرىپ جىبەرگەن”، - دەدى باقىتجان مۋلكاەۆ.
وقيعاعا كۋا بولعان تۇرعىندار العاشىندا اپات ەمەس، وقۋ-جاتتىعۋ دەپ تۇسىنگەنىن ايتادى.
“اۋىل تۇرعىندارى تىكۇشاق باسىندا اۋىلدىڭ ۇستىندە اينالشىقتاپ تۇرعانىن ايتتى. ولار تىكۇشاقتى اۋىلدىڭ سىرتىنا قاۋىپسىز جەرگە اپارىپ تۇر. باسىندا ءبارى بۇل جاعدايدى وقۋ-جاتتىعۋ شارالارى دەپ تۇسىنگەن. ۇشقىشتار اۋىلعا زيان كەلتىرمەس ءۇشىن قاۋىپسىز جەرگە شىعارىپ تۇر. سول جەردە تەمىر جولعا دا زيان كەلمەگەن. ۇشاقتا بولعان ەكى ادامنىڭ اماندىعىن تىلەيمىز”، - دەدى باقىتجان مۋلكاەۆ.
