Aqtóbe oblysynda tehnıkalyq aqaý shyǵyp, janyp ketken tikushaq apatyna qatysty jańa derekter belgili boldy, dep habarlaıdy “Adyrna” ulttyq portaly.
Oqıǵa kýágerleriniń aıtýynsha, ushqysh áskerı tikushaqty qaýipsiz jerge qondyrmaq bolǵan. Solaı aýyldyń ústin aınala ushypty.
Al aýyl syrtyna qulaǵan tikushaqty birinshi bolyp, aýyl sharýashylyq jármeńkesinen qaıtqan ákimdik qyzmetkerleri baıqaǵan. Mártók aýdandyq aýyl sharýashylyq bóliminiń basshysy Baqytjan Mýlkaev oqıǵanyń mán-jaıyn aıtyp berdi.
“Búgin aýdanda aýyl sharýashylyq jármeńkesi boldy. Qaıtar jolda osy oqıǵany kórdik. Qasymda aýdandyq máslıhat tóraǵasy boldy. Birden 112-ge jáne jedel járdem qyzmetine habar berdik. Ol jerde oılanyp turatyn ýaqyt bolǵan joq. Sebebi tikushaqtyń qasynda eki adam jatty. Bireýi qolyn bulǵady. Shamasy qulaǵan kezde ishinde bolǵandardy syrtqa laqtyryp jiberse kerek. Kólikti alysqa tastap, jaıaýlap jettik. Bireýi esin bilmeıdi, ekinshisi “Batyr qalyp qoıdy” dep sóılep jatty. Tikushaq janyp jatqandyqtan bizge oǵan kirý múmkindigi bolmady. Ekeýin súırelep alystatqanda “tars” etip atyldy. Ekeýiniń denesinde kúıik joq. Jerge soqqan kezde laqtyryp jibergen”, - dedi Baqytjan Mýlkaev.
Oqıǵaǵa kýá bolǵan turǵyndar alǵashynda apat emes, oqý-jattyǵý dep túsingenin aıtady.
“Aýyl turǵyndary tikushaq basynda aýyldyń ústinde aınalshyqtap turǵanyn aıtty. Olar tikushaqty aýyldyń syrtyna qaýipsiz jerge aparyp tur. Basynda bári bul jaǵdaıdy oqý-jattyǵý sharalary dep túsingen. Ushqyshtar aýylǵa zııan keltirmes úshin qaýipsiz jerge shyǵaryp tur. Sol jerde temir jolǵa da zııan kelmegen. Ushaqta bolǵan eki adamnyń amandyǵyn tileımiz”, - dedi Baqytjan Mýlkaev.
