توقاەۆ ەلدەگى جىلۋ جۇيەسىنىڭ ەسكىرگەنىن اتاپ، ۇكىمەت پەن اكىمدىكتەردىڭ مۇقيات بولۋىن ەسكە سالدى، دەپ جازادى “ادىرنا” پورتالى. بۇل تۋرالى ول “ەگەمەن قازاقستان” گازەتىنن بەرگەن سۇحباتىندا ايتتى.
“جىلۋ ەلەكتر ورتالىقتارىنداعى جانە تۇرعىن ءۇي-كوممۋنالدىق شارۋاشىلىعىنداعى مۇشكىل احۋال – كوپ جىلعى سالعىرتتىقتىڭ سالدارى. وسى سالاداعى تۇيتكىلدەر ءبىر كۇندە اياق استىنان پايدا بولا قالعان جوق. ونىڭ ءبارى جىلدار بويى قوردالانعان ماسەلەلەر ەكەنى بارشاعا ءمالىم. وڭىرلەردەگى جىلۋ ورتالىقتارى مەن باسقا دا قۇرال-جابدىقتاردىڭ 80 پايىزى ابدەن توزعان. وتكەن جىلداردا كوممۋنالدىق شارۋاشىلىققا سالىنعان ينۆەستيتسيا بۇل سالانىڭ قاجەتىن وتەۋگە جەتكىلىكسىز بولدى” دەدى توقاەۆ جىلۋ جۇيەلەرى جايلى.
ول ءوز سوزىندە ارانداتۋشىلاردىڭ دا ءىسىن اتاي كەتتى:
“ەلەكتر ەنەرگەتيكاسى نىساندارىندا بولىپ جاتاتىن كىشىگىرىم وقيعالاردى دارداي قىلىپ كورسەتىپ، جىلۋمەن قامتاماسىز ەتۋ ىسىندەگى بولماشى ولقىلىقتى «قاسىرەتكە اينالدىرۋعا» ۇمتىلاتىن الەۋمەتتىك جەلىدەگى بەلسەندىلەر وتقا ماي قۇيىپ، ەلدى دۇربەلەڭگە سالىپ ءجۇر”.
“بۇكىل قازاقستانداعى ينجەنەرلىك ينفراقۇرىلىمدى تولىق جاڭعىرتۋ – وتە اۋقىمدى ءارى كۇردەلى مىندەت. بۇل ماسەلە بىرتىندەپ شەشىلىپ جاتىر. كوكتەم-جاز ايلارىندا ۇكىمەت پەن اكىمدىكتەر جىلۋ ماۋسىمىنا دايىن بولۋ ءۇشىن ءبىراز جۇمىس جاسادى. جاعدايى سىن كوتەرمەيتىن بىرقاتار نىساندى جوندەدى. ەڭ الدىمەن، كۇردەلى اپاتتاردىڭ الدىن الىپ، ۇيلەرگە جىلۋدىڭ ۇزدىكسىز بەرىلۋىن قامتاماسىز ەتۋ كەرەك. بىراق جاڭا قۋات كوزدەرىن اشۋ، جەلىلەردى بىرتىندەپ جاڭارتۋ جانە كوممۋنالدىق سالانى تۇگەل جاڭعىرتۋ باستى مىندەت ەكەنىن ۇمىتپاعان ءجون” دەدى پرەزيدەنت.
سونىمەن قاتار، مەملەكەت باسشىسى قازىرگى تاڭدا ەلدەگى جىلۋ جۇيەسىنىڭ ارەڭ جۇمىس ىستەپ تۇرعانىن جاسىرمادى. جاعدايدى باقىلاۋعا الىپ، قاجەتتى شارالاردى جۇزەگە اسىرۋ قاجەتتىگىن ەسكە سالدى.
“قازىر جىلۋ جەلىلەرى ارەڭ جۇمىس ىستەپ تۇر. ۇكىمەت پەن اكىمدىكتەر باتىل قيمىلداپ، قاجەتتى شارالاردى دەرەۋ قولعا الۋى كەرەك. ونسىز بولمايدى” دەدى ول.
