امەريكا ءباسپاسوزى ەلدەگى پرەزيدەنت سايلاۋىنىڭ ناتيجەسى جايلى ارقيلى شولۋ جاسادى. كۇتكەندەي-اق، جەتەكشى امەريكالىق باق سوڭعى ءتورت جىلداعى ەڭ ءىرى ساياسي وقيعاعا گازەتتەرىنىڭ تۇتاس بەتتەرىن ارنادى. تانىمال باسىلىمدار وقىرمانداردى رەسپۋبليكالىق پارتيانىڭ جەڭىسىمەن قۇتتىقتاپ، دەموكراتتاردىڭ جەڭىلۋ سەبەبىن تالداپ، ەلدىڭ دونالد ترامپتىڭ كەزەكتى پرەزيدەنتتىك مەرزىمىندە قانداي باعىتتا داميتىنىنا وي جۇگىرتۋدە.
«جاڭادان سايلانعان پرەزيدەنت ترامپ اق ۇيدەگى جەڭىسىنەن كەيىن امەريكانى «التىن عاسىرعا» جەتكىزۋگە جانە «ءبارىن تۇزەتۋگە» ۋادە بەردى»، - دەپ جازدى Fox News. تەلەارنا ترامپتىڭ ءوزىنىڭ جەڭىسىن «بارلىق ۋاقىتتاعى ەڭ ۇلى ساياسي وقيعا» دەپ اتاپ، ەلگە «ساۋىعۋعا كومەكتەسەمىن» دەگەن ۋادەسىن اتاپ ءوتتى.
National Review كونسەرۆاتيۆتى باسىلىمى «دەموكراتتار كۇن تارتىبىندە وزدەرىنىڭ قانشالىقتى تانىمال ەمەستىگى تۋرالى الاڭداتارلىق بەلگى الدى» تاقىرىبىندا ماقالا جاريالاعان. «كامالا حارريس پەن ونىڭ پارتياسىنىڭ ساتسىزدىكتەرىنە وزدەرىنەن باسقا ەشكىم كىنالى ەمەس. دەموكراتتار سايلاۋشىلاردى جەڭە الامىز دەپ ويلادى، بىراق سايلاۋشىلار ولاردىڭ قاتەلىگىن دالەلدەدى»، - دەپ جازدى گازەت.
«بۇرىنعى پرەزيدەنت جۇمىسشىلار، فەرمەرلىك ايماقتار تۇرعىندارى جانە «كوك جاعالىلار» تاراپىنان كورسەتىلگەن كۇشتى قولداۋدىڭ ارقاسىندا جەڭىسكە قول جەتكىزدى»، - دەپ جازدى The Wall Street Journal. اۆتورلاردىڭ پىكىرىنشە، ترامپ ءوزىنىڭ مىقتى تۇسىن دۇرىس پايدالانا الدى. ول كوپشىلىكپەن ءتىل تابىسىپ، شابۋىلعا كوشىپ، سايلاۋشىلارعا ءوز ماقساتىن ايقىن كورسەتە ءبىلدى. باسىلىم رەسپۋبليكاشىل پارتيا كوشباسشىسىنىڭ ءوزىن «ساياسي قارسىلاستارىنىڭ قۇربانى ءارى كۇرەسكەر» رەتىندە ءساتتى كورسەتكەنىن ايتتى. سونىمەن قاتار، ترامپتى جەڭىسكە جەتكىزگەن باستى قاسيەتى — ويىن اشىق ايتاتىن ادەتى ەكەنىن العا تارتتى. «ترامپ سايلاۋدا جەڭىسكە جەتىپ، ەكىنشى مۇمكىندىك الدى» دەلىنگەن باسىلىمنىڭ رەداكتورلىق ماقالاسىندا. ونىڭ بۇل مۇمكىندىكتى قالاي پايدالاناتىنى سوڭعى سەگىز جىلدا بايقالعان اقش-تاعى ءبولىنۋدى ەڭسەرۋ جولىنداعى جەتىستىگىنەن كورىنەتىنى دە اتاپ وتىلگەن.
«كوپتەگەن ەكىنشى مەرزىمدەر ساتسىزدىكپەن اياقتالادى، بىراق ترامپتىڭ ەكىنشى مەرزىمى باسقالارعا ۇقسامايدى»، «بۇل ەكىنشى مۇمكىندىكتى جىبەرىپ الۋ ۇلكەن قاتەلىك بولار ەدى»، «حالىق كوشباسشىنى جۇمىسقا الدى» دەگەن تاقىرىپپەن The New York Times گازەتىنە ماقالالار شىقتى. «ول جەڭىسكە كۇش ارقىلى ەمەس، حالىقتىڭ سەنىمىنىڭ ارقاسىندا جەتتى» دەپ جازدى باسىلىم.
گازەتتىڭ تاعى ءبىر اناليتيكالىق ماقالاسىندا «ەندى امەريكا 248 جىلدىق تاريحىندا بۇرىن-سوڭدى بولماعان اۆتوريتارلىق باسقارۋ ءستيلىنىڭ تابالدىرىعىندا تۇر. دونالد ترامپ بيلىككە قايتا ورالىپ، بەلگىسىزدىك ءداۋىرىن اشتى. ونىڭ جەڭىسى وقشاۋلانۋ ساياساتىنىڭ، اۋقىمدى تاريفتەردىڭ جانە كەك قايتارۋدىڭ قاۋىپىن بايقاتادى» دەلىنگەن.
«ترامپ اق ۇيگە قايتا ورالادى»، «ترامپتىڭ جەڭىسى – ونىڭ ەڭ ۇلى قايتا ورلەۋى» – وسىنداي ءىرى تاقىرىپپەن The Washington Post باسىلىمىندا ماتەريالدار شىقتى. سونداي-اق، گازەت اۆتورلىق ماقالالار سەرياسىن جاريالادى. ولاردىڭ تاقىرىپتارىنىڭ ءوزى كوپ نارسەنى اڭعارتادى. ماسەلەن، «ءحارريستىڭ جەڭىلىسى – سولشىلدار ءۇشىن اۋىر ۇكىم»، «ترامپقا قارسىلىقتىڭ ەكىنشى راۋندى ءدال قازىر باستالۋى كەرەك»، «ونىڭ پرەزيدەنتتىك كەزەڭى ءوز سايلاۋ ناۋقانىنداي قاراڭعى بولا ما؟»، «ترامپتىڭ جەڭىسىنەن كەيىن رەسەي قۋاندى، ال ەۋروپا ءوزىن باتىل ۇستاۋعا تىرىسۋدا».
Associated Press اگەنتتىگى «سايلاۋشىلاردىڭ ەكونوميكاعا الاڭداۋشىلىعى جانە وزگەرىسكە دەگەن ۇمتىلىسى ترامپتى اق ۇيگە قايتاردى» تاقىرىبىمەن اناليتيكالىق ماقالاسىن جاريالادى. ماقالادا ساۋالناما ناتيجەلەرىنە سىلتەمە جاساي وتىرىپ، امەريكالىقتاردىڭ ەلدىڭ دامۋىنىڭ قازىرگى باعىتىنان كوڭىلى قالعانى سونشالىق، ولار ترامپتىڭ «باتىل جانە كۇيرەتۋشى» ءتاسىلىن قولدايتىنىن ايتقان.
رەسپۋبليكاشىل كانديداتتىڭ جەڭىسىمەن كۇرەس «ەندى عانا باستالدى» دەپ ەسەپتەيتىن NBC « دونالد ترامپتى ەندى كىم توقتاتادى؟» - دەپ سۇرايدى. اۆتورلاردىڭ پىكىرىنشە، ەگەر ترامپ ءوزىنىڭ سىنشىلارىنا قارسى شىعىپ، ءوز قاۋىپ-قاتەرلەرىن جۇزەگە اسىرعىسى كەلسە، ەلدە «ساياسي زورلىق-زومبىلىق» كۇشەيۋى مۇمكىن. سونداي-اق، ترامپتىڭ CBS تەلەارناسىنا جابۋ قاۋىپىن توندىرۋىنە بايلانىستى مەديا-لاندشافتتا وزگەرىستەر بولۋى ىقتيمال.
Bloomberg باسىلىمى «ترامپتىڭ ءپوپۋليزمى اق ۇيگە سالتاناتتى تۇردە ورالعاننان كەيىن اشىلدى» تاقىرىبىنداعى ماقالاسىندا «ەندى ول اق ۇيگە اتقارۋشى بيلىك تەتىكتەرىن تولىق يەلەنىپ كەلدى، ءارى بۇرىنعىدان دا كەڭ ەركىندىگىمەن قالاعانىنشا باسقارۋعا مۇمكىندىك الدى»، - دەپ جازدى.
ال، Politico باسىلىمى «كامالا نەگە سايلاۋدا جەڭىلدى؟» دەگەن سۇراق قويىپ، وزدەرى «ويتكەنى ول دجو بايدەننىڭ ۆيتسە-پرەزيدەنتى بولعان الدىڭعى ءتورت جىلدان تولىعىمەن باس تارتا المادى» دەپ جاۋاپ بەرگەن. باسىلىمنىڭ پىكىرىنشە، ءدال وسى «بايدەننىڭ ەلەسىن جويماۋ» كامالا ءحارريستىڭ سايلاۋشىلاردى ەلدىڭ باعىتىن وزگەرتۋگە قابىلەتتى ەكەنىنە سەندىرۋىنە كەدەرگى كەلتىردى.
«امەريكا ترامپتى قايتا سايلاعانىنا وكىنەدى» تاقىرىبىمەن The Hill گازەتىنىڭ سايتىندا ەڭ تانىمال ماقالالاردىڭ ءبىرى جارىق كوردى. «دەموكراتيا ءۇشىن ەڭ ناشار ستسەناري شىنايى ۋاقىتتا ىسكە اسۋدا. دەموكراتيالىق ينستيتۋتتار دا، امەريكالىقتار دا الدا بولاتىن دۇنيەگە دايىن ەمەس، – دەپ جازدى باسىلىم.
Newsweek جۋرنالىندا «دونالد ترامپ جەڭىسكە جەتكەن جوق: دەموكراتتار جەڭىلدى» دەگەن تاقىرىپپەن اۆتورلىق ماقالا جاريالاندى. ماقالادا دەموكراتتاردىڭ جەڭىلۋ سەبەبى رەتىندە كانديدات تاڭداۋ ستراتەگياسىنىڭ جوقتىعىن جانە «ەشقاشان بولماعان» جوسپاردى ۇستانعانى ايتىلادى.
«دەموكراتتار كۇن سايىن بارلىق جاعىنان ۇتىلىپ وتىردى. جەڭىلۋ مۇمكىن ەمەس ءارى قيسىنسىز بولىپ كورىندى. بىراق دەموكراتيالىق پارتيا «جەڭىس اۋزىنان جەڭىلىستى جۇلىپ الۋدىڭ» جولىن تاعى دا تاپتى جانە بۇل جولى ونى الەمدىك ارەنادا جاسادى» - دەپ جازدى ماقالا اۆتورى كەكەسىنمەن.
