Amerıka baspasózi eldegi prezıdent saılaýynyń nátıjesi jaıly árqıly sholý jasady. Kútkendeı-aq, jetekshi amerıkalyq BAQ sońǵy tórt jyldaǵy eń iri saıası oqıǵaǵa gazetteriniń tutas betterin arnady. Tanymal basylymdar oqyrmandardy respýblıkalyq partııanyń jeńisimen quttyqtap, demokrattardyń jeńilý sebebin taldap, eldiń Donald Tramptyń kezekti prezıdenttik merziminde qandaı baǵytta damıtynyna oı júgirtýde.
«Jańadan saılanǵan prezıdent Tramp Aq úıdegi jeńisinen keıin Amerıkany «Altyn ǵasyrǵa» jetkizýge jáne «bárin túzetýge» ýáde berdi», - dep jazdy Fox News. Telearna Tramptyń óziniń jeńisin «barlyq ýaqyttaǵy eń uly saıası oqıǵa» dep atap, elge «saýyǵýǵa kómektesemin» degen ýádesin atap ótti.
National Review konservatıvti basylymy «Demokrattar kún tártibinde ózderiniń qanshalyqty tanymal emestigi týraly alańdatarlyq belgi aldy» taqyrybynda maqala jarııalaǵan. «Kamala Harrıs pen onyń partııasynyń sátsizdikterine ózderinen basqa eshkim kináli emes. Demokrattar saılaýshylardy jeńe alamyz dep oılady, biraq saılaýshylar olardyń qateligin dáleldedi», - dep jazdy gazet.
«Burynǵy prezıdent jumysshylar, fermerlik aımaqtar turǵyndary jáne «kók jaǵalylar» tarapynan kórsetilgen kúshti qoldaýdyń arqasynda jeńiske qol jetkizdi», - dep jazdy The Wall Street Journal. Avtorlardyń pikirinshe, Tramp óziniń myqty tusyn durys paıdalana aldy. Ol kópshilikpen til tabysyp, shabýylǵa kóship, saılaýshylarǵa óz maqsatyn aıqyn kórsete bildi. Basylym respýblıkashyl partııa kóshbasshysynyń ózin «saıası qarsylastarynyń qurbany ári kúresker» retinde sátti kórsetkenin aıtty. Sonymen qatar, Trampty jeńiske jetkizgen basty qasıeti — oıyn ashyq aıtatyn ádeti ekenin alǵa tartty. «Tramp saılaýda jeńiske jetip, ekinshi múmkindik aldy» delingen basylymnyń redaktorlyq maqalasynda. Onyń bul múmkindikti qalaı paıdalanatyny sońǵy segiz jylda baıqalǵan AQSh-taǵy bólinýdi eńserý jolyndaǵy jetistiginen kórinetini de atap ótilgen.
«Kóptegen ekinshi merzimder sátsizdikpen aıaqtalady, biraq Tramptyń ekinshi merzimi basqalarǵa uqsamaıdy», «Bul ekinshi múmkindikti jiberip alý úlken qatelik bolar edi», «Halyq kóshbasshyny jumysqa aldy» degen taqyryppen The New York Times gazetine maqalalar shyqty. «Ol jeńiske kúsh arqyly emes, halyqtyń seniminiń arqasynda jetti» dep jazdy basylym.
Gazettiń taǵy bir analıtıkalyq maqalasynda «endi Amerıka 248 jyldyq tarıhynda buryn-sońdy bolmaǵan avtorıtarlyq basqarý stıliniń tabaldyryǵynda tur. Donald Tramp bılikke qaıta oralyp, belgisizdik dáýirin ashty. Onyń jeńisi oqshaýlaný saıasatynyń, aýqymdy tarıfterdiń jáne kek qaıtarýdyń qaýipin baıqatady» delingen.
«Tramp Aq úıge qaıta oralady», «Tramptyń jeńisi – onyń eń uly qaıta órleýi» – osyndaı iri taqyryppen The Washington Post basylymynda materıaldar shyqty. Sondaı-aq, gazet avtorlyq maqalalar serııasyn jarııalady. Olardyń taqyryptarynyń ózi kóp nárseni ańǵartady. Máselen, «Harrıstiń jeńilisi – solshyldar úshin aýyr úkim», «Trampqa qarsylyqtyń ekinshi raýndy dál qazir bastalýy kerek», «Onyń prezıdenttik kezeńi óz saılaý naýqanyndaı qarańǵy bola ma?», «Tramptyń jeńisinen keıin Reseı qýandy, al Eýropa ózin batyl ustaýǵa tyrysýda».
Associated Press agenttigi «Saılaýshylardyń ekonomıkaǵa alańdaýshylyǵy jáne ózgeriske degen umtylysy Trampty Aq úıge qaıtardy» taqyrybymen analıtıkalyq maqalasyn jarııalady. Maqalada saýalnama nátıjelerine silteme jasaı otyryp, amerıkalyqtardyń eldiń damýynyń qazirgi baǵytynan kóńili qalǵany sonshalyq, olar Tramptyń «batyl jáne kúıretýshi» tásilin qoldaıtynyn aıtqan.
Respýblıkashyl kandıdattyń jeńisimen kúres «endi ǵana bastaldy» dep esepteıtin NBC « Donald Trampty endi kim toqtatady?» - dep suraıdy. Avtorlardyń pikirinshe, eger Tramp óziniń synshylaryna qarsy shyǵyp, óz qaýip-qaterlerin júzege asyrǵysy kelse, elde «saıası zorlyq-zombylyq» kúsheıýi múmkin. Sondaı-aq, Tramptyń CBS telearnasyna jabý qaýipin tóndirýine baılanysty medıa-landshaftta ózgerister bolýy yqtımal.
Bloomberg basylymy «Tramptyń popýlızmi Aq úıge saltanatty túrde oralǵannan keıin ashyldy» taqyrybyndaǵy maqalasynda «endi ol Aq úıge atqarýshy bılik tetikterin tolyq ıelenip keldi, ári burynǵydan da keń erkindigimen qalaǵanynsha basqarýǵa múmkindik aldy», - dep jazdy.
Al, Politico basylymy «Kamala nege saılaýda jeńildi?» degen suraq qoıyp, ózderi «óıtkeni ol Djo Baıdenniń vıe-prezıdenti bolǵan aldyńǵy tórt jyldan tolyǵymen bas tarta almady» dep jaýap bergen. Basylymnyń pikirinshe, dál osy «Baıdenniń elesin joımaý» Kamala Harrıstiń saılaýshylardy eldiń baǵytyn ózgertýge qabiletti ekenine sendirýine kedergi keltirdi.
«Amerıka Trampty qaıta saılaǵanyna ókinedi» taqyrybymen The Hill gazetiniń saıtynda eń tanymal maqalalardyń biri jaryq kórdi. «Demokratııa úshin eń nashar senarıı shynaıy ýaqytta iske asýda. Demokratııalyq ınstıtýttar da, amerıkalyqtar da alda bolatyn dúnıege daıyn emes, – dep jazdy basylym.
Newsweek jýrnalynda «Donald Tramp jeńiske jetken joq: demokrattar jeńildi» degen taqyryppen avtorlyq maqala jarııalandy. Maqalada demokrattardyń jeńilý sebebi retinde kandıdat tańdaý strategııasynyń joqtyǵyn jáne «eshqashan bolmaǵan» jospardy ustanǵany aıtylady.
«Demokrattar kún saıyn barlyq jaǵynan utylyp otyrdy. Jeńilý múmkin emes ári qısynsyz bolyp kórindi. Biraq demokratııalyq partııa «jeńis aýzynan jeńilisti julyp alýdyń» jolyn taǵy da tapty jáne bul joly ony álemdik arenada jasady» - dep jazdy maqala avtory kekesinmen.
