8 قاراشا كۇنى قازاق ۇلتتىق قىزدار پەداگوگيكالىق ۋنيۆەرسيتەتىندە قازاقستان پارلامەنتى سەناتىنىڭ دەپۋتاتى، ۇلاعاتتى ۇستاز نوكەتاەۆا دينار جۇسىپالىقىزىنىڭ 60 جاسقا تولۋىنا وراي كەزدەسۋ ءوتتى.
نوكەتاەۆا دينار جۇسىپالىقىزى – قازاقستان پارلامەنتى سەناتىنىڭ دەپۋتاتى، قازاقستاننىڭ ءبىلىم بەرۋ سالاسىنا ايتۋلى ۇلەس قوسقان تانىمال تۇلعا، پەداگوگيكا عىلىمدارىنىڭ كانديداتى. قازاق ۇلتتىق قىزدار پەداگوگيكالىق ۋنيۆەرسيتەتىنىڭ ماتەريالدىق بازاسىن نىعايتىپ، ءبىلىم ساپاسىن ارتتىرۋ باعىتىندا ەلەۋلى جۇمىستار جۇرگىزگەن تاجىريبەلى ۇستاز.
بۇگىنگى كەزدەسۋ ۇستازدىڭ كاسىبي جەتىستىكتەرىن اتاپ ءوتىپ، ءبىلىم بەرۋ جۇيەسىنىڭ دامۋىنا قاتىستى وزەكتى ماسەلەلەردى تالقىلاۋعا باعىتتالدى.
تاعىلىمعا تولى كەزدەسۋدە ۋنيۆەرسيتەتتىڭ جەتكەن جەتىستىكتەرى مەن العا قويعان جوسپارلارى دا ايتىلدى. سونىمەن قاتار ستۋدەنتتەر ۇلاعاتتى ۇستازعا بەينەروليك ارقىلى ىستىق ىقىلاستارىن جەتكىزىپ، ءوز العىستارىن ايتتى.
«مەن 30 جىلعا جۋىق دينار جۇسىپالىقىزىمەن بىرگە قىزمەت ەتىپ كەلە جاتىرمىن. ول كىسىنىڭ ادامگەرشىلىگى مەن باستاعان ءىسىن سوڭىنا دەيىن جەتكىزەتىن قاسيەتى بارشامىزعا ۇلگى. دينار جۇسىپالىقىزىنىڭ باسشىلىعىمەن ۋنيۆەرسيتەت ۇلتتىق رەيتينگ ۇزدىگى، «QS حالىقارالىق رەيتينگىسىندە 3 جۇلدىز» يەگەرى اتاندى. سونىمەن قاتار 9 قاباتتىق جاتاقحانا، «اققۋ» باسسەينى، «قازاق ارۋى» سۋبۇرقاعى سالىندى. ءبىلىم الۋشىلار دا عىلىم، سپورت، ونەر سالالارىندا ەلەۋلى جەتىستىكتەرگە جەتتى»، - دەدى "قازنۇر" گۋمانيتارلىق كوللەدجىنىڭ ديرەكتورى سابىروۆا زاۋرەش قۋاندىققىزى.
ءىس-شارا اياسىندا باسقارما توراعاسى-رەكتورى گۇلميرا قاناي دينار جۇسىپالىقىزىن مەرەيتويىمەن قۇتتىقتاپ، قازاق ۇلتتىق قىزدار پەداگوگيكالىق ۋنيۆەرسيتەتى اتىنان سىيلىق تابىستادى. سونداي-اق كەزدەسۋگە ارنايى قوناق بولىپ كەلگەن ۋنيۆەرسيتەت تۇلەكتەرىن توسبەلگىمەن ماراپاتتادى.
ۇستازدىڭ ءبىلىم سالاسىنا قوسقان قىزمەتىن باعالاپ، جاس پەداگوگتارعا ۇلگى رەتىندە كورسەتۋ ءۇشىن وتكەن كەزدەسۋ كونتسەرتتىك باعدارلاماعا ۇلاستى.
