8 қараша күні Қазақ ұлттық қыздар педагогикалық университетінде Қазақстан Парламенті Сенатының депутаты, ұлағатты ұстаз Нөкетаева Динар Жүсіпәліқызының 60 жасқа толуына орай кездесу өтті.
Нөкетаева Динар Жүсіпәліқызы – Қазақстан Парламенті Сенатының депутаты, Қазақстанның білім беру саласына айтулы үлес қосқан танымал тұлға, педагогика ғылымдарының кандидаты. Қазақ ұлттық қыздар педагогикалық университетінің материалдық базасын нығайтып, білім сапасын арттыру бағытында елеулі жұмыстар жүргізген тәжірибелі ұстаз.
Бүгінгі кездесу ұстаздың кәсіби жетістіктерін атап өтіп, білім беру жүйесінің дамуына қатысты өзекті мәселелерді талқылауға бағытталды.
Тағылымға толы кездесуде университеттің жеткен жетістіктері мен алға қойған жоспарлары да айтылды. Сонымен қатар студенттер ұлағатты ұстазға бейнеролик арқылы ыстық ықыластарын жеткізіп, өз алғыстарын айтты.
«Мен 30 жылға жуық Динар Жүсіпәліқызымен бірге қызмет етіп келе жатырмын. Ол кісінің адамгершілігі мен бастаған ісін соңына дейін жеткізетін қасиеті баршамызға үлгі. Динар Жүсіпәліқызының басшылығымен университет Ұлттық рейтинг үздігі, «QS халықаралық рейтингісінде 3 жұлдыз» иегері атанды. Сонымен қатар 9 қабаттық жатақхана, «Аққу» бассейні, «Қазақ аруы» субұрқағы салынды. Білім алушылар да ғылым, спорт, өнер салаларында елеулі жетістіктерге жетті», - деді "ҚазНұр" гуманитарлық колледжінің директоры Сабырова Зәуреш Қуандыққызы.
Іс-шара аясында Басқарма Төрағасы-Ректоры Гүлмира Қанай Динар Жүсіпәліқызын мерейтойымен құттықтап, Қазақ ұлттық қыздар педагогикалық университеті атынан сыйлық табыстады. Сондай-ақ кездесуге арнайы қонақ болып келген университет түлектерін төсбелгімен марапаттады.
Ұстаздың білім саласына қосқан қызметін бағалап, жас педагогтарға үлгі ретінде көрсету үшін өткен кездесу концерттік бағдарламаға ұласты.
