رەسەي فەدەراتسياسىنىڭ قازاق ۇلتى كوپ تۇراتىن ومبى، استراحان مەن ورىنبور قالالارىندا قازاق مەكتەپتەرى سالىنۋى مۇمكىن، دەپ حابارلايدى "ادىرنا" رەسەي سىرتقى ىستەر مينيسترلىگىنە سىلتەپ.
رەسەيدىڭ سىرتقى ىستەر ءمينيسترى لاۆروۆتىڭ ايتۋىنشا، قازاقستان رەسەيدە ءۇش مەكتەپ اشسا، رەسەي قازاقستاندا دا ءۇش مەكتەپ اشاتىن بولاتىن.
«قاسىم-جومارت توقاەۆ رەسەي مادەنيەتىنىڭ وشاقتارىن قۇرۋعا قاتىستى ماسەلەلەردى قوزعاعان. وسى تۇرعىدا بۇگىن قازاقستاندا ورىس تىلىندە ءبىلىم بەرۋ قىزمەتتەرىن ۇسىناتىن ءۇش بىرلەسكەن مەكتەپ قۇرۋ تالقىلاندى. قازاقستاندىق ارىپتەستەرىمىز رەسەيدىڭ كەيبىر قالالارىندا: ورىنبور، ومبى جانە استراحاندا قازاق تىلىندە وقىتاتىن وسىنداي بىرلەسكەن مەكتەپتەرگە قىزىعۋشىلىق تانىتتى»، – دەدى لاۆروۆ.
لاۆروۆ قازاقستان مەن رەسەي تاريحىنا قاتىستى ماسەلەلەردىڭ ەكى ەلدە دە قىزۋ تالقىلانىپ جاتاتىن اتاپ ءوتىپ، وسى ماسەلەدە داۋلى جاعدايلاردى تۋدىرماس ءۇشىن بىرلەسكەن تاريحشىلار توبىن قۇرىلاتىنىن ايتتى.
“رەسەي مەن قازاقستاندا ءبىزدىڭ ورتاق تاريحي وتكەنىمەن جانە قازىرگى تاريحىمەن بايلانىستى تاقىرىپتار پەريودتى تۇردە تۋىنداپ وتىرادى. وسى رەتتە، بىرلەسكەن تاريحشىلار توبىن قۇرۋ تۋرالى وڭ كەلىسىمگە قول جەتكىزىلگەنىن اتاپ وتكىم كەلەدى»، - دەگەن بولاتىن رەسەيدىڭ سىرتقى ىستەر ءمينيسترى سەرگەي لاۆروۆ استاناداعى مەملەكەتتىك باسقارۋ اكادەمياسىنىڭ ديپلوماتيا ينستيتۋتىندا.
سونىمەن قاتار، رەسەيدىڭ سىرتقى ىستەر ءمينيسترى قازاقستاندا اەس سالۋ ماسەلەسىنە قاتىستى ءوز ۇسىنىستارىن ايتقان ەدى.
«رەسەي كومەكتەسۋگە عانا ەمەس، ناقتى ۇسىنىستارىن دا بەرىپ ۇلگەردى»، – دەدى سەرگەي لاۆروۆ.
ونىڭ سوزىنشە، رەسەي بيلىگى قازاقستاندا اەس سالۋ ماسەلەسىنە ارنالعان رەفەرەندۋمنىڭ بارىسى مەن ناتيجەلەرىن باقىلاعان. لاۆروۆ «روساتوم» كورپوراتسياسى ءوزىنىڭ بارلىق بىلىكتىلىگىن ۇسىنۋعا جانە ىنتىماقتاسۋعا تولىقتاي دايىن ەكەنىن دە اتاپ ءوتتى.
