قارجىلىق مونيتورينگ اگەنتتىگىنىڭ دەپارتامەنتى الماتى وبلىسىنىڭ پروكۋراتۋراسىمەن بىرلەسە وتىرىپ، «شاڭىراق» قوعامدىق بىرلەستىگىنىڭ باسشىسى الماسبەك سادىربايدى ۇستادى. ول 1,2 ميلليارد تەڭگە كولەمىندە زاڭسىز سۋبسيديا العانى ءۇشىن كۇدىككە ءىلىندى، دەپ حابارلايدى «ادىرنا» ۇلتتىق پورتالى قما ءباسپاسوز قىزمەتىنە سىلتەپ.
قما مالىمەتىنشە، الماسبەك سادىرباي بالقاش، ەڭبەكشىقازاق، كەگەن، رايىمبەك جانە ۇيعىر اۋداندارىندا جالعان اۋىلشارۋاشىلىق كووپەراتيۆتەرىن قۇرعان ادامدار توبىن باسقارعان.
"نەگىزگى ماقسات – قوي-ەشكى مال باسىن ۇرىقتاندىرۋعا سۋبسيديالار مەن ازىق شىعىندارىن وتەۋگە زاڭسىز سۋبسيديالار الۋ. وسى ءۇشىن اۋىل شارۋاشىلىعى جەرلەرى جوق بولسا دا، شارۋاشىلىقتار زاڭسىز تارتىلعان. كەيىن سۋبسيديا الۋعا جالعان مالىمەتتەردى، سونىڭ ىشىندە جالعان كاداسترلىق نومىرلەردى كورسەتىپ، قاشىقتان وتىنىشتەر بەرىلگەن. بۇل رەتتە اۋىلشارۋاشىلىق كووپەراتيۆتەرىنىڭ باسشىلارىنىڭ ەتسق-سىن ولاردىڭ كەلىسىمىنسىز قولدانعان", – دەپ مالىمدەدى قما.
«شاڭىراق» قوعامدىق بىرلەستىگىنىڭ باسشىسى اسا ءىرى كولەمدەگى الاياقتىق جاسادى دەگەن كۇدىكپەن ۇستالدى. ونىڭ سىبايلاسى سوت سانكتسياسىمەن ۇيقاماققا الىندى.
وسىدان ءۇش كۇن بۇرىن الماسبەك سادىرباي الماتى وبلىسىنداعى ادىلەتسىزدىك تۋرالى ايتىپ، وزىنە قىسىم جاسالىپ جاتقانىن ءبىلدىرىپ، پرەزيدەنتكە ۇندەۋ جاساعان ەدى. يۋتۋب جەلىسىندە جاريالانعان ۆيدەو وسى ۋاقىت ىشىندە 65 مىڭنان استام قارالىم جيناعان. جەلى قولدانۋشىلارى الماسبەك سادىربايدى قولدايتىندارىن ايتىپ پىكىر قالدىرۋدا.
