بۇرىن مەملەكەتتىك قۇپيامەن جۇمىس ىستەگەن تۇلعالار شەتەلگە رۇقساتسىز شىققان جاعدايدا جاۋاپكەرشىلىككە تارتىلۋى مۇمكىن. قازىرگى زاڭنامادا تەك قۇپيامەن جۇمىس ىستەۋ قۇقىعى بار قىزمەتكەرلەرگە عانا جاۋاپكەرشىلىك قاراستىرىلعان. ال بۇعان دەيىن قۇپيا اقپاراتقا قول جەتكىزگەندەرگە ەشقانداي شارا قولدانىلماعان. ۇلتتىق قاۋىپسىزدىك كوميتەتى وسى ولقىلىقتى تۇزەتۋ ماقساتىندا «اكىمشىلىك قۇقىقبۇزۋشىلىق تۋرالى» كودەكستىڭ 504-بابىنا وزگەرىس ەنگىزۋدى ۇسىندى، دەپ حابارلايدى «ادىرنا» ءتىلشىسى.
بۇل باستاما مەملەكەتتىك قۇپيالاردىڭ ساقتالۋىن نىعايتۋعا باعىتتالعان. سونداي-اق قۇپيا اقپاراتتىڭ تەحنيكالىق قورعالۋىن جانە قۇپيالىق رەجيمىنىڭ جۇيەلى تۇردە بۇزىلۋىنا قاتىستى جاۋاپكەرشىلىكتى كۇشەيتۋ ماسەلەسى دە قاراستىرىلىپ جاتىر.
كوميتەت «اكىمشىلىك قۇقىقبۇزۋشىلىق تۋرالى» كودەكستىڭ 504-بابىندا جەكەلەگەن بولىكتەر رەتىندە ىسكە اسىرىپ، سالىناتىن ايىپپۇل مولشەرىن ۇلعايتۋدى ورىندى دەپ سانايدى.
ەسكە سالا كەتەيىك، بۇعان دەيىن ءماجىلىس دەپۋتاتى مارات باشيموۆ ۇقك-عا سۇراۋ سالىپ، قۇپيا اقپاراتقا قول جەتكىزگەن بۇرىنعى تۇلعالار شەتەلگە شىعىپ جاتقاندا قانداي باقىلاۋ شارالارى قولدانىلادى دەپ سۇراعان بولاتىن. ايتۋىنشا، ولاردىڭ كەيبىرى الەمدى ارالاپ، شەت مەملەكەتتەردىڭ، شەتەلدىك قۇرىلىمداردىڭ باسشىلارىمەن كەزدەسىپ ءجۇر.
