Buryn memlekettik qupııamen jumys istegen tulǵalar shetelge ruqsatsyz shyqqan jaǵdaıda jaýapkershilikke tartylýy múmkin. Qazirgi zańnamada tek qupııamen jumys isteý quqyǵy bar qyzmetkerlerge ǵana jaýapkershilik qarastyrylǵan. Al buǵan deıin qupııa aqparatqa qol jetkizgenderge eshqandaı shara qoldanylmaǵan. Ulttyq qaýipsizdik komıteti osy olqylyqty túzetý maqsatynda «Ákimshilik quqyqbuzýshylyq týraly» kodekstiń 504-babyna ózgeris engizýdi usyndy, dep habarlaıdy «Adyrna» tilshisi.
Bul bastama memlekettik qupııalardyń saqtalýyn nyǵaıtýǵa baǵyttalǵan. Sondaı-aq qupııa aqparattyń tehnıkalyq qorǵalýyn jáne qupııalyq rejıminiń júıeli túrde buzylýyna qatysty jaýapkershilikti kúsheıtý máselesi de qarastyrylyp jatyr.
Komıtet «Ákimshilik quqyqbuzýshylyq týraly» kodekstiń 504-babynda jekelegen bólikter retinde iske asyryp, salynatyn aıyppul mólsherin ulǵaıtýdy oryndy dep sanaıdy.
Eske sala keteıik, buǵan deıin Májilis depýtaty Marat Bashımov UQK-ǵa suraý salyp, qupııa aqparatqa qol jetkizgen burynǵy tulǵalar shetelge shyǵyp jatqanda qandaı baqylaý sharalary qoldanylady dep suraǵan bolatyn. Aıtýynsha, olardyń keıbiri álemdi aralap, shet memleketterdiń, sheteldik qurylymdardyń basshylarymen kezdesip júr.
