دەنساۋلىق ساقتاۋ مينيسترلىگى قازاقستاندا كاليانداردى ساتۋ مەن شەگۋگە تولىق تىيىم سالۋ مۇمكىندىگى تۋرالى ايتتى دەپ، حابارلايدى «ادىرنا» ۇلتتىق پورتالى Tengrinews.kz-كە سىلتەمە جاساپ.
Tengrinews.kz رەداكتسياسىنىڭ رەسمي ساۋالىنا بەرگەن جاۋاپتا دەنساۋلىق ساقتاۋ مينيسترلىگى قوعامدىق ورىنداردا كاليان ساتۋعا تىيىم سالۋ ماسەلەسى تالقىلانىپ جاتقانىن ايتقان.
«كاليانداردىڭ كەڭىنەن پايدالانىلۋىنا بايلانىستى رەتتەۋدى كۇشەيتۋ قاجەتتىلىگى تۋىندادى. كاليان تاباگى مەن كاليان قوسپاسىن (ساتۋ مەن تۇتىنۋ) رەتتەۋدى كۇشەيتۋ ماسەلەسى، سونداي-اق ولاردى تۇتىنۋدى تومەندەتۋ بويىنشا پروفيلاكتيكالىق شارالار تالقىلانۋدا»، - دەلىنگەن مينيسترلىكتىڭ جاۋاپ حاتىندا.
قازاقستاندا قوعامدىق ورىنداردا كاليان شەگۋگە زاڭمەن تىيىم سالىنعان. دەگەنمەن، كاليانداردىڭ ساتىلۋىنا تىيىم جوق، ياعني كاسىپورىندار كاليانداردى ساتۋعا قۇقىلى، بىراق ولاردى تەك جەكە تۇرعىن ۇيلەردە شەگۋگە بولادى.
«قولدانىستاعى زاڭناماعا سايكەس رەتتەۋشىلىك اسەرگە تالداۋ ء(رات) جۇرگىزۋ قاجەت. زاڭناماعا ەنگىزىلەتىن نورما جوباسى، مەملەكەتتىك رەتتەۋشى ورگاننىڭ انىقتاماسى، ايىپپۇل مولشەرىن وزگەرتۋ قاجەتتىلىگى قاراستىرىلادى. ءرات اياقتالعاننان كەيىن بيزنەس قاۋىمداستىق وكىلدەرىنىڭ قاتىسۋىمەن قوعامدىق تىڭداۋلار وتەدى»، - دەدى دەنساۋلىق ساقتاۋ مينيسترلىگى.
ەستەرىڭىزگە سالا كەتەيىك، كوكتەمدە دەنساۋلىق ساقتاۋ مينيسترلىگى قازاقستاندا كاليانعا تولىق تىيىم سالۋ ماسەلەسىن تالقىلاپ جاتقانىن مالىمدەدى. مينيسترلىك وكىلدەرىنىڭ پىكىرىنشە، قازاقستاندىقتار ايىپپۇلداردىڭ جەتكىلىكسىز بولۋىنا بايلانىستى كاليان شەگۋگە تىيىم سالاتىن زاڭدى ساقتامايدى.
