جىل باسىنان بەرى قارجى مونيتورينگى اگەنتتىگى 34 بلوگەردىڭ زاڭسىز ونلاين-ويىنداردى جارنامالاۋعا قاتىسى بارىن انىقتادى، دەپ حابارلايدى «ادىرنا» ءتىلشىسى.
اگەنتتىكتىڭ مالىمەتىنشە، ولاردىڭ قاتارىندا قايسار قامزا، شىڭعىسحان كوپباەۆ («Baller»), ءتاۋىرجان ايتماحانوۆ، نايل تۇرعانوۆ، ديليارا امانقوسقىزى، سونداي-اق زۋحرا حاكيەۆا، ديانا حالمەتوۆا، اسەم اۋباكيروۆا، ارينا بايكوۆا، كۇمىساي ايىمبەتوۆا جانە وزگە دە تانىمال تۇلعالار بار.
جالپى 11 بلوگەر اكىمشىلىك جاۋاپكەرشىلىككە تارتىلعان. ال 23 كونتەنت جاساۋشىعا قاتىستى ماتەريالدار مادەنيەت مينيسترلىگىنە جولداندى. اگەنتتىك مالىمەتىنشە، كوپتەگەن بلوگەر زاڭدى ءبىر رەتتىك ەمەس، جۇيەلى تۇردە بۇزىپ كەلەدى.
ماسەلەن، شىڭعىسحان كوپباەۆ («Baller») جىل باسىنان بەرى ونلاين-كازينو جارناماسى ءۇشىن بەس رەت جاۋاپقا تارتىلعان. 600 مىڭنان استام جازىلۋشىسى بار مۋزىكانت-بلوگەر رينات شامشىراققا دا اكىمشىلىك ءىس قوزعالعان. قايسار قامزا ءوزىنىڭ تەلەگرام ارناسىندا زاڭسىز ويىنداردى ءجيى ناسيحاتتاپ، جالعان جەڭىمپازداردىڭ ۆيدەولارىن جاريالاپ كەلگەن. نايل تۇرعانوۆ – ونلاين-كازينو جارناماسى ءۇشىن 8 ملن تەڭگەدەن استام قارجى العان. نۇرعازى توقتاروۆ («Nakonay Qarapaiym») اگرەسسيۆتى جارناما جۇرگىزىپ، 15,8 ملن تەڭگە پايدا تاپقان، الايدا قارجىنىڭ جارتىسىنا جۋىعىن سول پلاتفورمالاردا ويناپ، ۇتىلىپ قالعان.
زاڭسىز جارناماعا قىزدار دا تارتىلعان. ماريام قۇلجاباەۆا («@oomariko») ينتەرنەت-كازينودا تىركەلۋگە شاقىرعان ستوريستەرىن نەبارى 350 مىڭ تەڭگەگە باعالاعان. اگەنتتىك دەرەگىنشە، ونىڭ «قاراپايىم» جارناماسىنىڭ قۇرباندارى ميلليونداپ شىعىنعا باتقان. سونىمەن بىرگە، زۋحرا حاكيەۆا، ديانا حالمەتوۆا، اسەم اۋباكيروۆا، ارينا بايكوۆا، كۇمىساي ايىمبەتوۆا جانە تاعى باسقا بلوگەرلەردىڭ ەسىمدەرى اتالدى.
اگەنتتىك قازىرگى تاڭدا مۇنداي ارەكەتتەردى قر قك-ءنىڭ 28-بابىنىڭ 5-تارماعى بويىنشا «زاڭسىز ويىن بيزنەسىنە كومەكتەسۋ» رەتىندە قاراستىرۋدى جوسپارلاپ وتىر. بۇعان قوسا قارجى پيراميدالارىن جارنامالاۋ كەزىندەگىدەي، ونلاين-كازينو جارناماسى ءۇشىن دە قىلمىستىق جاۋاپكەرشىلىك ەنگىزۋ باستاماسى كوتەرىلدى.
قما بلوگەرلەردى زاڭدى قاتاڭ ساقتاپ، قوعام الدىنداعى جاۋاپكەرشىلىكتى سەزىنۋگە شاقىردى.
