وزبەكستاننىڭ فەرعانا وبلىسى دانگارين اۋدانىنىڭ قىلمىستىق ىستەر جونىندەگى سوتى جەرگىلىكتى تۇرعىنعا سايلاۋ تۋرالى زاڭنامانى بۇزعانى ءۇشىن ايىپپۇل سالدى، دەپ حابارلايدى «ادىرنا» ۇلتتىق پورتالى Uznews.uz سايتىنا سىلتەمە جاساپ.
مۇعالىم ا. م. 27 قازاندا وتكەن وزبەكستان پارلامەنتى مەن جەرگىلىكتى كەڭەستەردى سايلاۋدا ۋچاسكەلىك سايلاۋ كوميسسياسىنىڭ مۇشەسى بولىپ جۇمىس ىستەگەن. ول سايلاۋ كەزىندە ۋاقىتتى ۇنەمدەۋ ءۇشىن ءبىر ازاماتقا ءتورت بيۋللەتەننەن ارتىق بەرىپ، ونىڭ باسقا ادامداردىڭ دا اتىنان داۋىس بەرۋىنە مۇمكىندىك بەرگەن.
سوت وتىرىسىندا ا. م. كىناسىن تولىق مويىندادى. سوت ونى وزبەكستاننىڭ اكىمشىلىك جاۋاپكەرشىلىك كودەكسىنىڭ 51-10-بابى («سايلاۋ بيۋللەتەندەرىن بەرۋ ءتارتىبىن بۇزۋ») بويىنشا قۇقىق بۇزۋشىلىق جاساعانى ءۇشىن كىنالى دەپ تانىدى. مۇعالىمگە بازالىق ەسەپتىك كورسەتكىشتىڭ ءبىر مولشەرى — 375 مىڭ سۋم (29 دوللار) كولەمىندە ايىپپۇل سالىندى.
