كەلىن قانداي جاعدايدا سالەم سالماعان؟ 

5699
Adyrna.kz Telegram

 

قازاقتا ۇلكەنگە ءيىلىپ سالەم سالۋ ارقىلى اق باتا، جاقسى ءسوز ەستيتىن كەلىن­نىڭ باعى ارتادى دەپ جاتادى. ال كەلىن سالەم سالماي جاتسا، اجەلەر ءتىپتى "تىزەڭ سىنسىن" دەپ ايتاتىن بولعان. بىراق بەلگىلى ءبىر جاعدايعا بايلانىستى كەزىندە كەلىندەر سالەم سالۋدان بوساتىلعان ەكەن. بۇل تۋرالى Tengrinews.kz تىلشىسىنە تاريحشى جۇلدىز ورمانوۆا ايتتى.  ونىڭ ايتۋىنشا، كەلىننىڭ اتا-ەنەسى مەن قايىن جۇرتىنا دەگەن قۇرمەتىن بىلدىرەتىن بۇل ءداستۇر وتە قاتاڭ ساقتالىپ كەلسە، كەيبىر جاعدايلاردا كەلىندەرگە ول ءداستۇردى ورىنداماۋعا بولادى. "قازاقتا كەلىنگە قاتىستى سالت-داستۇرلەر مەن ولارعا جۇكتەلەتىن مىندەتتەر وتە كوپ. دەگەنمەن، تاريحقا ۇڭىلسەك، كەلىن اياعى اۋىر بولعان كەزدە سالەم سالۋ مىندەتىنەن بوساتىلعان. جۇكتى كەلىندى بولاشاق انا رەتىندە ساناپ، كەرىسىنشە، وعان قۇرمەت ءبىلدىرىپ، استى-ۇستىنە تۇسكەن. ال بىراق قازىر، شىنى كەرەك، كەلىندەر جۇكتىلىگىنىڭ سوڭعى ايىندا بولسا دا ۇيات دەپ، سالەمىن سالىپ جاتادى. سالت-ءداستۇردى قۇرمەتتەگەنى دە دۇرىس شىعار", - دەيدى تاريحشى. سونداي-اق، ول كۇيەۋى قايتىس بولعان جاعدايدا كەلىننىڭ سالەم سالۋدان بوساتىلاتىنىن ايتادى. "كۇيەۋى قايتىس بولعان جاعدايدا كەلىن سالەم سالۋدان ءبىرجولا بوساتىلعان. جولداسىنان ايىرىلعان كەلىندى جۇباتىپ، بارىنشا قامقورشىلىق كورسەتكەن. كوبى جەسىر ايەل cالەم سالۋى كەرەك پە، سالماۋى كەرەك پە دەپ سۇراپ جاتادى. بىراق سالتىمىز بويىنشا كەلىندەر مۇنداي قايعىلى جاعدايدا سالەم سالۋدان بوساتىلۋى ءتيىس. ونىڭ ەش ايىبى جوق، قۇرمەتسىزدىك تانىتتى دەپ ايىپتاۋعا بولمايدى. كۇيەۋى قايتىس بولعان جەسىر ايەلگە جىلىن بەرگەنشە، ءبىر جىل بويى سالەم سالماۋعا رۇقسات ەتىلەدى", - دەيدى تاريحشى. بۇدان بولەك ورمانوۆا كەلىندەر توركىندەرىنە سالەم سالمايدى دەيدى. ايتۋىنشا، قازاق كەلىنى تەك قايىن جۇرتقا ءيىلىپ، سالەم بەرۋى ءتيىس. تاريحي مالىمەتتەرگە سۇيەنسەك، سالەم سالۋ ءداستۇرى تەك تۇركى حالىقتارىنا ەمەس، سونىمەن قاتار، ەۋروپا حالىقتارىنا دا ورتاق. ەڭ قىزىعى ۇلىبريتانياداعى، انگلياداعى كورولدىك وتباسىلارىندا كەلىندەر ءالى كۇنگە دەيىن سالەم سالادى. ونىڭ سوزىنشە، قازاق كەلىندەرى قالاي سالەم سالسا، سول سياقتى انگليانىڭ كورولدىك وتباسىلارىنداعى كەلىندەر دە سولاي سالەم سالادى ەكەن.

 

"ادىرنا" ۇلتتىق پورتالى

پىكىرلەر