بۇگىن تۇركىستان قالاسىندا «جاستار ورتالىعىنىڭ» جاڭا عيماراتى پايدالانۋعا بەرىلدى. سالتاناتتى شاراعا قاتىسقان تۇركىستان وبلىسىنىڭ اكىمى دارحان ساتىبالدى تۇركىستاندىق جاستارعا زاماناۋي ورتالىقتىڭ كىلتىن تابىستاپ، ءار باستامالارىنا ساتتىلىك تىلەدى
"تۇركىستان وبلىسى – دەموگرافيالىق ءوسىمى جوعارى ايماق. سونىڭ ىشىندەگى 14-35 جاس ارالىعىنداعى جاستار سانى 663 مىڭنان اسىپ، حالىق سانىنىڭ 30% قۇرايدى. تۇركىستان قالاسىنىڭ وزىندە بۇگىندە 72 مىڭعا جۋىق جاس تۇرادى. بۇل – ۇلكەن دەموگرافيالىق كورسەتكىش جانە ادام كاپيتالى. بيىل تۇركىستان وبلىسىنىڭ قۇرىلعانىنا 6 جىل تولىپ وتىر. وسى از عانا ۋاقىت ىشىندە تۇركىستان قالاسىندا جاستارعا قولايلى جاعدايلار جاساۋ ماقساتىندا ءتۇرلى مادەني، سپورتتىق نىساندار بوي كوتەردى. سونىڭ ءبىرى، مىنە، بۇگىنگى تۇركىستان قالاسىنىڭ «جاستار رەسۋرستىق ورتالىعى» عيماراتىنىڭ اشىلۋ راسىمىندە جينالىپ تۇرمىز. بۇل عيمارات تۇركىستان جاستارىنا شابىت بەرىپ، ەلگە قىزمەت ەتەتىن جاستاردى بىرىكتىرەتىن ورتالىق بولادى دەپ سەنەمىن. جاستاردىڭ عيماراتى قۇتتى بولىپ، باستاماشىل ورتالىققا اينالا بەرسىن!" – دەدى وبلىس باسشىسى.
جاستار ورتالىعىنا ارنالعان بۇل نىسان جەرگىلىكتى بيۋدجەت ەسەبىنەن بوي كوتەردى. ساۋلەتى مەن سالتاناتى كەلىسكەن عيمارات تاۋلىگىنە 100-دەن اسا جاسقا قىزمەت كورسەتەدى. وندا جاستارعا ءبىلىمىن كوتەرىپ، سالاۋاتتى ءومىر سالتىن ۇستانۋعا، شىعارماشىلىقپەن اينالىسۋعا بارلىق جاعداي جاسالعان. ورتالىق ارنايى دەمالىس ايماعى، ستريت-ۆوركاۋت الاڭى، ەلەكتروندى كىتاپحانا بولمەسى، ۇيىرمەلەرگە ارنالعان بولمەلەر، شاعىن سپورتزال جانە كوپفۋنكتسيونالدى زالدارىمەن قامتاماسىز ەتىلگەن. ەرىكتىلەرگە ارنايى ۇلكەن زال مەن كينوتەاتر دا قاراستىرىلعان. ودان بولەك، ورتالىق جانىنان امفيتەاتردىڭ قۇرىلىس جۇرگىزىلىپ جاتىر.
ايتا كەتەيىك، تۇركىستان قالاسىندا 14-35 جاس ارالىعىندا 71 486 جاس بار. قالاداعى 2 جوعارعى وقۋ ورىندا 12 265 ستۋدەنت ءبىلىم الىپ جاتىر. 8 ورتا ارناۋلى وقۋ ورىندارىندا ستۋدەنتتەر سانى – 7441. تۇركىستان قالاسى بويىنشا جالپى ورتا مەكتەپتەردە 7-11 سىنىپتاردا 18 844 وقۋشى ءبىلىم الۋدا.
