شىڭعىس حاننىڭ تۋعانىنا 862 جىل تولۋىنا وراي بىرىككەن ۇلتتار ۇيىمىنىڭ سەگىزىنشى باس حاتشىسى پان گي مۋندى "شىڭعىس حان" وردەنىمەن ماراپاتتاۋ تۋرالى شەشىم قابىلداندى. بۇل تۋرالى بۇگىن موڭعوليا پرەزيدەنتى ءاكىمشىلىگىنىڭ باسشىسى گومبوجاۆىن زاندانشاتار مالىمدەدى، دەپ حابارلايدى "ادىرنا" ۇلتتىق پورتالى.
"بۇۇ-نىڭ سەگىزىنشى باس حاتشىسى پان گي مۋن كورەيا رەسپۋبليكاسىنىڭ سىرتقى ىستەر ءمينيسترى بولعان كەزدە موڭعوليا مەن وڭتۇستىك كورەيا اراسىنداعى قاتىناستاردى ستراتەگيالىق سەرىكتەستىك دەڭگەيىنە شىعارۋعا قۇندى ۇلەس قوستى. سونىمەن قاتار, 2009 جىلى ءبىزدىڭ ەلگە ساپارى كەزىندە ول ەكى ەل اراسىنداعى قارىم-قاتىناستى بارلىق جاعىنان جاقسارتۋعا نازار اۋداردى جانە بۇل پروتسەسكە ءوز ۇلەسىن قوستى. سونىمەن بىرگە بۇۇ مەن موڭعوليا اراسىنداعى قارىم - قاتىناس جاڭا دەڭگەيگە كوتەرىلىپ, بۇۇ ءبىزدىڭ قاۋىپسىزدىگىمىز بەن وركەندەۋىمىزدىڭ كەپىلى ەكەنىن دالەلدەدى", - دەدى گومبوجاۆىن زاندانشاتار قابىلدانعان شەشىمدى جاريالاي وتىرىپ.
"شىڭعىس حان" وردەنى موڭعوليانىڭ ەگەمەندىگى مەن تاۋەلسىزدىگىن بەكىتۋگە، ۇلتتىق بىرلىكتى نىعايتۋعا، دەموكراتيالىق قوعام قۇرۋعا ەلەۋلى ۇلەس قوسقان ازاماتتارعا بەرىلەدى. سونىمەن قاتار، بۇل وردەن شەت ەلدەردىڭ مەملەكەت جانە قوعام قايراتكەرلەرىنە، بەيبىتشىلىك پەن قاۋىپسىزدىكتى قولداۋعا، موڭعوليانىڭ شەتەلدىك ەلدەرمەن ىنتىماقتاستىعىن دامىتۋعا، ەلدىڭ حالىقارالىق ارەناداعى بەدەلىن ارتتىرۋعا ۇلەس قوسقان ادامدارعا بەرىلەدى. ماراپات ولاردىڭ ەكونوميكالىق، الەۋمەتتىك جانە رۋحاني دامۋىنا قوسقان ناقتى ۇلەستەرىن مويىنداۋ بولىپ تابىلادى.
"شىڭعىس حان" وردەنى العاش رەت 2005 جىلى موڭعوليانىڭ تۇڭعىش پرەزيدەنتى پۋنسالمااگين وچيرباتقا تابىستالعان بولاتىن. ال شەتەل ازاماتتارى اراسىنان بۇل جوعارى مەملەكەتتىك ناگرادانى العاش رەت 2022 جىلى امەريكالىق موڭعولتانۋشى دجەك ۋەزەرفورد يەلەندى.
