Shyńǵys hannyń týǵanyna 862 jyl tolýyna oraı Birikken Ulttar Uıymynyń segizinshi Bas hatshysy Pan Gı Mýndy "Shyńǵys han" ordenimen marapattaý týraly sheshim qabyldandy. Bul týraly búgin Mońǵolııa prezıdenti ákimshiliginiń basshysy Gombojavyn Zandanshatar málimdedi, dep habarlaıdy "Adyrna" ulttyq portaly.
"BUU-nyń segizinshi Bas hatshysy Pan Gı Mýn Koreıa Respýblıkasynyń Syrtqy ister mınıstri bolǵan kezde Mońǵolııa men Ońtústik Koreıa arasyndaǵy qatynastardy strategııalyq seriktestik deńgeıine shyǵarýǵa qundy úles qosty. Sonymen qatar, 2009 jyly bizdiń elge sapary kezinde ol eki el arasyndaǵy qarym-qatynasty barlyq jaǵynan jaqsartýǵa nazar aýdardy jáne bul proeske óz úlesin qosty. Sonymen birge BUU men Mońǵolııa arasyndaǵy qarym - qatynas jańa deńgeıge kóterilip, BUU bizdiń qaýipsizdigimiz ben órkendeýimizdiń kepili ekenin dáleldedi", - dedi Gombojavyn Zandanshatar qabyldanǵan sheshimdi jarııalaı otyryp.
"Shyńǵys han" ordeni Mońǵolııanyń egemendigi men táýelsizdigin bekitýge, ulttyq birlikti nyǵaıtýǵa, demokratııalyq qoǵam qurýǵa eleýli úles qosqan azamattarǵa beriledi. Sonymen qatar, bul orden shet elderdiń memleket jáne qoǵam qaıratkerlerine, beıbitshilik pen qaýipsizdikti qoldaýǵa, Mońǵolııanyń sheteldik eldermen yntymaqtastyǵyn damytýǵa, eldiń halyqaralyq arenadaǵy bedelin arttyrýǵa úles qosqan adamdarǵa beriledi. Marapat olardyń ekonomıkalyq, áleýmettik jáne rýhanı damýyna qosqan naqty úlesterin moıyndaý bolyp tabylady.
"Shyńǵys han" ordeni alǵash ret 2005 jyly Mońǵolııanyń tuńǵysh prezıdenti Pýnsalmaagıın Ochırbatqa tabystalǵan bolatyn. Al shetel azamattary arasynan bul joǵary memlekettik nagradany alǵash ret 2022 jyly amerıkalyq mońǵoltanýshy Djek Ýezerford ıelendi.
