قازاقستاندا اۆتوموبيل ءوندىرىسى وتكەن جىلمەن سالىستىرعاندا 2,1 پايىزعا ازايدى، دەپ حابارلايدى "ادىرنا" ۇلتتىق پورتالى.
قازاقستان اۆتوموبيل وداعىنىڭ مالىمەتىنشە، 2024 جىلدىڭ العاشقى توعىز ايىندا ەلدە 92 243 بىرلىك تەحنيكا ءوندىرىلدى. ونىڭ ىشىندە:
- جەڭىل اۆتوموبيلدەر – 82 877 دانا (-16,7 پايىزعا ازايعان),
- جۇك كولىكتەرى – 5 896 دانا (-15,2 پايىزعا ازايعان),
- اۆتوبۋستار – 1 838 دانا (-7,5 پايىزعا ازايعان).
قازاقستان اۆتوموبيل وداعىنىڭ پرەزيدەنتى انار ماكاشەۆانىڭ ايتۋىنشا، ءوندىرىس كولەمىنىڭ تومەندەۋى لوگيستيكا، جابدىقتاۋ، شيكىزات جانە قوسالقى بولشەكتەردى جاقىن ەلدەر ارقىلى جەتكىزۋدەگى ۋاقىتشا قيىندىقتاردى كورسەتەدى.
وڭىرلەر بويىنشا ءوندىرىس كولەمى:
- قوستاناي (Allur) – 55 122 دانا (-16,2 پايىز),
- الماتى (Hyundai Trans Kazakhstan, Hyundai Trans Almaty) – 29 583 دانا (-21,9 پايىز),
- سەمەي (سەماز، Daewoo Bus Kazakhstan) – 3 933 دانا (+36,1 پايىز),
- قاراعاندى وبلىسى (QazTehna) – 1 008 دانا (+1,5 پايىز),
- كوكشەتاۋ (كاماز-ينجينيرينگ) – 812 دانا (-13,7 پايىز),
- باسقا وندىرۋشىلەر – 1 755 دانا (+9,3 پايىز).
ەسكە سالا كەتەيىك، 2022 جىلى "وكم وپەراتورىنىڭ" شوتتارىندا تۇرعان 220 ميلليارد تەڭگەنىڭ 100 ميلليارد تەڭگەسىن جەڭىلدەتىلگەن اۆتونەسيەگە باعىتتاۋ تۋرالى شەشىم قابىلدانعان بولاتىن. جەڭىلدەتىلگەن اۆتونەسيەلەرگە وتىنىمدەر نەبارى 18 سەكۋندتا قابىلدانعان.
كەيىننەن بۇل قاراجاتتى قالالىق اۆتوبۋستاردى جەڭىلدەتىلگەن پايىزدىق مولشەرلەمەمەن ليزينگكە الۋ ءۇشىن باعىتتاۋ تۋرالى شەشىم قابىلداندى. ونەركاسىپ جانە قۇرىلىس ءمينيسترى قانات شارلاپاەۆتىڭ ايتۋىنشا، بۇل شەشىم دۇرىس بولعان.
"بۇل قاراجات قالالىق، ايماقتىق جانە وبلىس ورتالىقتارىنداعى قوعامدىق كولىكتى دامىتۋعا جۇمسالدى. مەنىڭشە، بۇل دۇرىس شەشىم: جەڭىلدەتىلگەن نەسيە بەرۋدىڭ ورنىنا، قوعامدىق كولىك ساپاسىن جاقسارتىپ، كوپتەگەن ازاماتتارىمىزدىڭ قاجەتتىلىگىن قامتاماسىز ەتەمىز. وسىلايشا، جەڭىلدەتىلگەن نەسيە بەرۋ ماسەلەسىن ءبىز ءبىر جارىم جىل بۇرىن جاۋىپ، قارجىنى تەك قوعامدىق كولىكتى دامىتۋعا باعىتتادىق،" – دەدى مينيستر.
باسقالارمەن بولىسە
وتىرىڭىز
