Qazaqstanda avtomobıl óndirisi ótken jylmen salystyrǵanda 2,1 paıyzǵa azaıdy, dep habarlaıdy "Adyrna" ulttyq portaly.
Qazaqstan avtomobıl odaǵynyń málimetinshe, 2024 jyldyń alǵashqy toǵyz aıynda elde 92 243 birlik tehnıka óndirildi. Onyń ishinde:
- jeńil avtomobılder – 82 877 dana (-16,7 paıyzǵa azaıǵan),
- júk kólikteri – 5 896 dana (-15,2 paıyzǵa azaıǵan),
- avtobýstar – 1 838 dana (-7,5 paıyzǵa azaıǵan).
Qazaqstan avtomobıl odaǵynyń prezıdenti Anar Makashevanyń aıtýynsha, óndiris kóleminiń tómendeýi logıstıka, jabdyqtaý, shıkizat jáne qosalqy bólshekterdi jaqyn elder arqyly jetkizýdegi ýaqytsha qıyndyqtardy kórsetedi.
Óńirler boıynsha óndiris kólemi:
- Qostanaı (Allur) – 55 122 dana (-16,2 paıyz),
- Almaty (Hyundai Trans Kazakhstan, Hyundai Trans Almaty) – 29 583 dana (-21,9 paıyz),
- Semeı (SemAZ, Daewoo Bus Kazakhstan) – 3 933 dana (+36,1 paıyz),
- Qaraǵandy oblysy (QazTehna) – 1 008 dana (+1,5 paıyz),
- Kókshetaý (KAMAZ-Injınırıng) – 812 dana (-13,7 paıyz),
- basqa óndirýshiler – 1 755 dana (+9,3 paıyz).
Eske sala keteıik, 2022 jyly "ÓKM Operatorynyń" shottarynda turǵan 220 mıllıard teńgeniń 100 mıllıard teńgesin jeńildetilgen avtonesıege baǵyttaý týraly sheshim qabyldanǵan bolatyn. Jeńildetilgen avtonesıelerge ótinimder nebary 18 sekýndta qabyldanǵan.
Keıinnen bul qarajatty qalalyq avtobýstardy jeńildetilgen paıyzdyq mólsherlememen lızıngke alý úshin baǵyttaý týraly sheshim qabyldandy. Ónerkásip jáne qurylys mınıstri Qanat Sharlapaevtyń aıtýynsha, bul sheshim durys bolǵan.
"Bul qarajat qalalyq, aımaqtyq jáne oblys ortalyqtaryndaǵy qoǵamdyq kólikti damytýǵa jumsaldy. Menińshe, bul durys sheshim: jeńildetilgen nesıe berýdiń ornyna, qoǵamdyq kólik sapasyn jaqsartyp, kóptegen azamattarymyzdyń qajettiligin qamtamasyz etemiz. Osylaısha, jeńildetilgen nesıe berý máselesin biz bir jarym jyl buryn jaýyp, qarjyny tek qoǵamdyq kólikti damytýǵa baǵyttadyq," – dedi mınıstr.
