ءماجىلىس دەپۋتاتى رينات زايىتوۆ ۇكىمەت باسشىسى ولجاس بەكتەنوۆتەن مەملەكەت باسشىسىنىڭ تاپسىرماسى نەگە ورىندالمايتىنىن سۇرادى، دەپ حابارلايدى "ادىرنا" ۇلتتىق پورتالى.
«جالپى مينيسترلەر كابينەتىندە مەملەكەت باسشىسىنىڭ تاپسىرماسى بويىنشا 400 جايلى مەكتەپ سالىنۋى كەرەك ەدى. الايدا ول 369 مەكتەپكە ءتۇستى جانە 157 مەكتەپتى سالۋعا ءالى اقشا جوق بولىپ وتىر. 2024 جىلدىڭ ساۋىرىنەن باستاپ مەملەكەت باسشىسىنىڭ تاپسىرماسى بويىنشا ەڭ تومەنگى جالاقى 85 مىڭ تەڭگەگە ۇلعايتىلۋى كەرەك ەدى. ەكونوميكا ءمينيسترىنىڭ ايتۋىنشا، بۇل ماسەلەدە دە قوزعالىستار جوق. 2025 جىلعا دەيىن 95 پايىز جەرگىلىكتى جولداردىڭ بارلىعى جوندەلۋى كەرەك ەدى، مۇنىڭ دا ىسكە اسۋى نەعايبىل ەكەنىنە كەلىسەتىن شىعارسىز. تاعىسىن تاعى جەتىپ جاتىر. ەلگە بەرگەن، بىزگە بەرگەن ۋادەلەردى ايتىپ ورىندالماعان ۋادەلەردى ايتىپ، ەشكىمنىڭ بەتىن قىزارتپاي-اق قوياىن. مينيسترلەر كابينەتىندە ءسوزدىڭ ءباتۋاسى بولماۋىنىڭ سەبەبى نەدە جانە ءسىزدىڭ وسىنى الدىن الۋ ءۇشىن قانداي جوسپارىڭىز بار؟»، – دەپ سۇرادى دەپۋتات.
رينات زايىتوۆتىڭ ۇزىن-سونار سۇراعىنا ۇكىمەت باسشىسى قىسقا-نۇسقا جاۋاپ بەردى.
«ۇكىمەتتىڭ جۇمىسى مەملەكەت باسشىسىنىڭ تاپسىرماسىن ورىنداۋعا باعىتتالعان. ءبىزدىڭ بارلىق ءىس-ارەكەتىمىز سوعان بايلانىستى. وسى بيۋدجەتتى قاراعان كەزدە 32 تريليون تەڭگەگە وتىنىمدەر ءتۇستى. بىراق قولىمىزدا بار قاراجات 15-اق تريلليون تەڭگە. وسى قاراجاتتىڭ شەڭبەرىندە ءبىز بارلىق جۇمىستاردى ۇيىمداستىرىپ جاتىرمىز. ال ارى قاراي ەكونوميكامىزدى دامىتىپ، ەلدە جوعارى وڭدەلگەن تاۋارلاردى ءوندىرۋىمىز قاجەت. سوندا بيۋدجەتتىك كىرىستەر ءوسىپ، ۋادەلەردىڭ ءبارى ورىندالاتىن بولادى»، – دەدى ول.
بۇگىن ءماجىلىستىڭ جالپى وتىرسىنا ۇكىمەت باسشىسى ولجاس بەكتەنوۆ باستاعان مينيسترلەر كابينەتىنىڭ مۇشەلەرى تۇگەل كەلدى. ءماجىلىستىڭ كۇن تارتىبىندە قر ۇلتتىق قورىنان 2025 – 2027 جىلدارعا ارنالعان كەپىلدەندىرىلگەن ترانسفەرت تۋرالى» قازاقستان رەسپۋبليكاسى زاڭىنىڭ جوباسى قارالىپ جاتىر.
