تەل-اۆيۆتە جۇك كولىگىنىڭ اۆتوبۋس ايالداماسىنا سوعىلۋى ناتيجەسىندە 37 ادام جارالاندى، ولاردىڭ التاۋىنىڭ جاعدايى اۋىر، دەپ حابارلايدى «ادىرنا» ۇلتتىق پورتالى.
وقيعا ورنىنا پوليتسيانىڭ ۇلكەن توبى مەن جەدەل مەديتسينالىق جاردەم بريگاداسى كەلدى. پوليتسيانىڭ ءباسپاسوز حاتشىسى ارە دوروننىڭ ايتۋىنشا، بۇل قۇقىق قورعاۋ ورگاندارى تاراپىنان ۇلتتىق سيپاتتاعى قىلمىس رەتىندە قاراستىرىلىپ، تەراكت رەتىندە باعالانۋدا.
جۇك كولىگىنىڭ جۇرگىزۋشىسى وقيعا ورنىندا اتىپ ءولتىرىلدى. ونىڭ اتى - رامي ناتۋر، 40 جاستا، ارابتىڭ كالانسۋا اۋىلىندا تۇراتىن يزرايل ازاماتى. تۋىستارىنىڭ ايتۋىنشا، ول «اۋرۋدان زارداپ شەككەن» جانە «باسقارۋدى جوعالتۋى مۇمكىن». ولار ونىڭ لاڭكەستىك ارەكەت جاساعانىنا سەنبەيمىز دەپ وتىر.
الدىن الا تەرگەۋ كورسەتكەندەي، اۆتوبۋس جولاۋشىلاردى ءتۇسىرۋ ءۇشىن ايالدامانىڭ جانىنا توقتاعان. وسى كەزدە جۇك كولىگى ايالداماعا كەلىپ، جولاۋشىلار مىنگەن اۆتوبۋسقا سوعىلدى. وقيعا ورنىنداعى بەيبىت تۇرعىندار جۇك كولىگى جۇرگىزۋشىسىنە وق جاۋدىرىپ، ونى بەيتاراپتاندىردى. وقيعانىڭ ءمان-جايى انىقتالىپ جاتىر.
اتالمىش تەراكت ورىن العان اۋداندا حەزبوللانىڭ نىسانالارىنىڭ ءبىرى بولىپ تابىلاتىن بىرنەشە تساحال اسكەري بازالارى ورنالاسقان. تەراكت ورىن العان جەرگە ەڭ جاقىن ورنالاسقان بازا – بارلاۋ بولىمشەلەرىنىڭ وقۋ بازاسى.
