يزرايل ادەيى يران اۋماعىنداعى ماڭىزدى ەنەرگەتيكالىق نىسانداردىڭ اينالاسىنداعى اۋە شابۋىلىنا قارسى قورعانىس (اشقق) جۇيەلەرىنە سوققى جاسادى، بىراق تىكەلەي نىسانالارعا سوققى بەرمەدى، دەپ حابارلايدى «ادىرنا» ۇلتتىق پورتالى. بۇل تۋرالى 26 قازان كۇنى The New York Times گازەتى اتى-ءجونىن اتاۋدى قالاماعان يراندىق جانە يزرايلدىك شەنەۋنىكتەرگە سىلتەمە جاساپ، مالىمدەدى.
يراندىق ءۇش شەنەۋنىك پەن يزرايل قورعانىس مينيسترلىگىنىڭ جوعارى لاۋازىمدى ءۇش وكىلىنىڭ ايتۋىنشا، يزرايل قورعانىس ارمياسىنىڭ (تساحال) ماقساتى حۋزەستان پروۆينتسياسىنداعى باندار يمام حومەيني مۇناي-حيميا كەشەنى جانىنداعى، باندار يمام حومەيني ءىرى پورتىنداعى، ابادان مۇناي وڭدەۋ زاۋىتى مەن يلام پروۆينتسياسىنداعى گاز كەن ورنىنداعى اۋە قورعانىس جۇيەلەرى بولعان.
The New York Times باسىلىمىنداعى يرانداعى دەرەككوزدەر ءيزرايلدىڭ اۋە قورعانىس جۇيەلەرىن جويۋى تەگەراندا «تەرەڭ الاڭداۋشىلىق» تۋدىرعانىن اتاپ ءوتتى. ويتكەنى بۇدان بىلاي ماڭىزدى ەنەرگەتيكالىق نىساندار بولاشاقتا بولۋى مۇمكىن شابۋىلدارعا وتە وسال كۇيدە.
يزرايل شەنەۋنىكتەرى NYT-كە بەرگەن سۇحباتىندا ءيزرايلدىڭ العاشقى جاۋاپ جوسپارى يراننىڭ يادرولىق جوباسىنا قاتىستى نىساندارعا سوققى بەرۋدى قامتيتىنىن راستادى. الايدا، امەريكا قۇراما شتاتتارىنىڭ تۇراقتى ۇسىنىستارىنا بايلانىستى بۇل قادامنان باس تارتۋ تۋرالى شەشىم قابىلداندى. ۆاشينگتون تاياۋ شىعىستاعى جاعدايدىڭ كۇرت شيەلەنىسۋ قاۋپى جوعارى بولعاندىقتان، ءيزرايلدىڭ يراننىڭ مۇناي جانە يادرولىق قوندىرعىلارىنا شابۋىلىن قولدامايتىنىن اتاپ ءوتتى.
يراننىڭ يادرولىق نىساندارىنا زيان تيگىزبەگەنى تۋرالى اقپاراتتى اتوم ەنەرگياسى جونىندەگى حالىقارالىق اگەنتتىكتىڭ (ماگاتە) باسشىسى رافاەل گروسسي بۇعان دەيىن راستاعان بولاتىن.
يرانداعى ماگاتە ينسپەكتورلارى قاۋىپسىز جانە «ماڭىزدى جۇمىستارىن جالعاستىرۋدا»، - دەپ جازدى گروسسي X الەۋمەتتىك جەلىسىندە. سونداي-اق، ول «يادرولىق جانە باسقا راديواكتيۆتى ماتەريالدارعا قاۋىپ توندىرەتىن ارەكەتتەرگە» قاتىستى ساقتىق پەن ۇستامدىلىققا شاقىردى.
يزرايل قورعانىس ارمياسى (IDF) 26 قازانعا قاراعان ءتۇنى يرانعا بىرقاتار اۋە شابۋىلدارىن جاسادى. يزرايل اسكەريلەرى بۇل جارىلىستار يران مەن ونىڭ وداقتاستارىنىڭ سوڭعى ايلارداعى كوپتەگەن شابۋىلدارىنا جاۋاپ بولدى دەپ مالىمدەدى. تاڭەرتەڭ IDF زىمىران شىعاراتىن كاسىپورىندارعا، زىمىران كەشەندەرىنە جانە باسقا دا اسكەري قوندىرعىلارعا «ءدال سوققىلار» جاساعان وپەراتسيانىڭ ءساتتى اياقتالعانى تۋرالى ەسەپ بەردى.
يران قارۋلى كۇشتەرى ءيزرايلدىڭ شابۋىلى سالدارىنان يران ارمياسىنىڭ ەكى قىزمەتكەرىنىڭ قازا تاپقانىن حابارلادى. يران قارۋلى كۇشتەرىنىڭ حابارلاماسىندا اۋە شابۋىلىنا قارسى قورعانىس كۇشتەرى ءيزرايلدىڭ شابۋىلىن تويتارعانى، بىراق كەيبىر ايماقتاردا زالال كەلگەنى ايتىلعان.
