دەپۋتات ەدىل جاڭبىرشين فەيسبۋكتەگى پاراقشاسىندا كولەمدى پوست جازىپ قالدىردى، ول پرەزيدەنتتىڭ سايلاۋدى نە سەبەپتى ەرتە وتكىزۋگە تۋرا كەلگەنىن جان-جاقتى تۇسىندىرگەن، دەپ حابارلايدى “ادىرنا” ۇلتتىق پورتالى.
2 قىركۇيەكتەگى ماجىلىستەگى «جاڭا قازاقستان» دەپۋتاتتىق توبىنىڭ مالىمدەمەسىنەن كەيىن قوعامدا، اسىرەسە الەۋمەتتىك جەلىدە قىزۋ تالقى باستالىپ كەتتى. ايتىلىپ جاتىرعان كەيبىر پىكىرلەر «نەگە ۋاقىتىنان بۇرىن پرەزيدەنتتىك سايلاۋ وتەدى؟»، «نەگە 7 جىلعا ءبىر رەت سايلاۋىمىز قاجەت؟»، «نەگە ۋاقىتىمەن پرەزيدەنت سايلاۋىن وتكىزە بەرمەيمىز؟»، «كونستيتۋتسياعا نەگە وزگەرىس ەنگىزە بەرەمىز؟» دەگەن باعىتتا. ياعني، ەكى ۇلكەن ماسەلە حالىقتى تولعاندىرىپ وتىر:
1. كەزەكتەن تىس پرەزيدەنتتىك سايلاۋ جانە ونىڭ 7 جىلدىق مەرزىمى;
2. پرەزيدەنت ق.ك. توقاەۆقا قاتىستى پىكىرلەر.
ءبىرىنشى ماسەلەگە بايلانىستى.
ەلدەگى ساياسي جانە ەكونوميكالىق احۋالدى بارىمىزدە كورىپ وتىرمىز. جاعداي قيىنداماسا، جاقسارعان جوق. ول تۋرالى وتكەندە پوستىمدا شەت جاعاسىن جازدىم. 30 جىل بويى قالىپتاسىپ كەلگەن جەمقورلىق قوعامنىڭ بارلىق جەرىنە، وبىر (راك) اۋرۋى سياقتى كىرىپ كەتكەن. «اۋرۋ باتپانداپ كىرىپ، مىسقالداپ شىعادى» دەمەكشى بۇل «اۋرۋدى ەككەن» جانە ونى ءوز مۇددەلەرىنە پايدالانىپ وتىرعان كۇشتەر بار ەكەنىن مەكتەپتىڭ بالاسىنا دەيىن بىلەدى. ولاردىڭ ماقساتى سول باياعى رەسۋرستارعا يەلىك ەتىپ، ءوز بيلىكتەرىن قايتارىپ الۋ. ولاردا دوللارمەن ەسەپتەگەندە ميللياردتاعان قارجى بار، اقپاراتتىق رەسۋرستارى تاعى بار، بيلىكتىڭ بارلىق تارماقتارىنا كىرىپ العان ادامدارى بار. ولاردىڭ قۇرعان جۇيەسى ەلدى كەدەيلىككە الىپ كەلدى. مەملەكەت باسقارۋدى حالىقتىڭ ءال-اۋقاتىن جوعارلاتۋعا ەمەس، ونى توناۋعا باعىتتادى. ءالى دە سول ارەكەت ءجۇرىپ جاتىر. زاڭدى دا، بانكتەردى دە، ءتىپتى كۇشتىك قۇرىلىمداردى دا وزدەرىنە ىڭعايلى قىلىپ جاسادى. حالىقارالىق زاڭدارمەن، كەلىسىم-شارتتارمەن بەكىتىپ، قازاقستاندى جەكەمەنشىك «جابىق اكتسيونەرلىك قوعام» قىلىپ الىپ، بۇكىل بايلىعىن سورىپ وتىر. ءبىز بىلمەيتىن، تونالىپ جاتىرعان دۇنيە كوپ.
90-شى جىلداردىڭ باسىندا كوممۋنيستىك يدەولوگيادان ەلىمىز ارىلعاننان كەيىن، مەملەكەت باسىنداعىلار ءوزىمىزدىڭ ۇلتتىق يدەولوگيامىزدى قالىپتاستىرعان جوق. نەگە؟ ويتكەنى قازاق حالقى - اسىل حالىق ەدى. ونىڭ نەشە عاسىرلىق ءدىلى مەن ءدىنى، تاريحى مەن مادەنيەتى كوپ ەلدەن كوش ىلگەرى ەدى. سونىڭ ارقاسىندا بابالارىمىز الەمگە رۋحانياتتىڭ نۇرىن شاشتى، سول زاماننىڭ وزىق تەحنولوگيالارىن دۇنيەگە اكەلدى. ەڭ باستىسى الەمدە ادىلدىك ورناتتى! ال، بىزدە نە بولدى؟ تاۋەلسىز قازاقستاندا ءتول رۋحانياتتىمىزدى تورگە شىعارماي، دۇنيە ماسەلەسىنە باستى كوڭىل ءبولىپ، «ەكونوميكا ءبارىن تۇزەيدى» - دەپ، بايلىقتى «پريحۆاتيزاتسيا» جاساۋعا كوشتى. ال، يدەولوگيالىق ۆاككۋم ەشقاشاندا بولمايدى، بوس جەرگە نەشە ءتۇرلى اعىمدار كىرەدى. ەڭ سوراقىسى يسلام اتىن جامىلعان قاسكويلەر ەلىمىزدىڭ يدەولوگياسىن تالقانداپ، سوناۋ اتا-بابادان كەلە جاتىرعان رۋحانياتىمىزدىڭ ءتۇپ-تامىرىنا بالتا شابا باستادى. ونى بيلىك كوردى، قارسى كەلمەدى، ءتىپتى قولداپ وتىردى. سەبەبى ۇلتتىق يدەولوگيامىز ادىلدىككە الىپ كەلىپ، حالىقتىڭ بايلىعىن توناتپايتىن ەدى!
اۋ، اعايىن! رۋحانياتىڭدى بۇعاتتاپ جانە تۇگەلگە جۋىق بايلىعىڭدى ازعانتاي ازعىن توپتىڭ، كلاننىڭ قولىنا ءوتىپ، كەمى 25 جىل ءوز بيلىكتەرىنە الىپ، ونى شىراينالدىرىپ وتىرعان زاماندا نە ىستەۋ كەرەك؟ تاريحتان بەلگىلى قيسايىپ كەتكەن نارسەنى تۇزەۋدىڭ ەكى جولى بار. بىرەۋى – رەۆوليۋتسيالىق (حيرۋرگيالىق), ەكىنشىسى – ەۆوليۋتسيالىق (تەراپيالىق). رەۆوليۋتسيالىق جولى وتە اۋىر جول – ويتكەنى وندا قان توگىلەدى. شابۋ، كەسۋ، جۇلۋ، وپىرۋ بولادى. ەكى نەمەسە بىرنەشەگە بولىنگەن كۇشتەر ۇرىسقا شىعادى. ونى سىزدەر مەنەن جاقسى بىلەسىزدەر. كەزىندە رەسەي پاتشالىعىن رەۆوليۋتسيامەن قۇلاتتى. سول زاماندا قانشاما ەل قىرىلدى، قان سۋشا اقتى. ونى جاساعانداردا يمان، اياۋشىلىق، مەيىرىم دەگەن نارسەلەر بولعان جوق. ولار قۇدايدى جوققا شىعارعان توبىر ەدى. ول بىزگە كەرەك پە؟ قازاقتى، قازاق قۇرتىپ قۇرعان مەملەكەت كىمگە كەرەك؟ ليچنو ماعان كەرەك ەمەس! سىزگە دە كەرەك ەمەس دەپ ويلايمىن!
ەۆوليۋتسيالىق جول – زاڭ اياسىندا، ازاماتتىق قوعام قۇرىپ، باسقارۋ جۇيەسىن وگىزدى دە ولتىرمەي، اربانى دا سىندىرماي وزگەرتۋ. ينكليۋزيۆتى مەملەكەت قۇرۋ. بىراق ونى جاساۋعا كەدەرگىلەر كوپ. كەشەگى قاڭتار وقيعاسى سونىڭ دالەلدەرىنىڭ ءبىرى. وپاسىزدار مەملەكەتتە توڭكەرىس جاساپ، بيلىكتى العىلارى كەلدى. قۇدايعا شۇكىر ول ارامزا ويلارى ىسكە اسقان جوق. بۇلاردىڭ ەندىگى ويى – بيلىكتى ەۆوليۋتسيالىق جولمەن الىپ، وزدەرىنىڭ «حاليفاتىن» جاساۋ نەمەسە انا ءبىر ايەلدى، نەمەرە، كۇيەۋلەردى بيلىككە اكەلۋ. بولماسا سولاردىڭ ايتقانىنان شىقپايتىن قۋىرشاقتى قويۋ. وركەش مايدى سورىپ، حالىققا از-ماز بىردەڭەنى لاقتىرىپ تاستاپ، وزدەرى قۇرىپ العان جەكەمەنشىك «جابىق اكتسيونەرلىك قوعامدا» وتىرا بەرۋ. ول بىزگە كەرەك پە؟! ونى قولداساڭىزدار قازاقستان توچنو قۇردىمعا كەتەدى! ەكىنشى سيريا بولماعانىمەن، سوعان جاقىندايمىز!
بۇل جازىپ وتىرعاندارىڭنىڭ «كەزەكتەن تىس ءبىر مەرزىمگە 7 جىلعا سايلاناتىن پرەزيدەنتكە قانداي قاتىسى بار؟» - دەگەن سۇراق تۋىنداۋى مۇمكىن. جالپى ءبىز كوبىنەسە ماسەلەنىڭ تەك ءبىر جاعىن كورەمىز. سودان اقيقاتىن كورە الماي، پىكىر ايتامىز. ەگەر پرەزيدەنت كەلەسى سايلاۋدى نە 2023 نەمەسە 2024 جىلى وتكىزەتىن بولسا، انا جۇرگەن «اكتسيونەرلەر» مەن «پارازيتتەر» ساقاداي ساي كەلىپ، وزدەرىنىڭ ادامىن الىپ كەلەدى جانە قاپاستا وتىرعان «جاقىندارىن» شىعارىپ الادى. ولاردىڭ اقشاسى پىشەن، نە ويلاپ، نە دايىنداپ وتىرعاندارىن ءبىر قۇداي بىلەدى. ال، ولار وسى كۇزدە پرەزيدەنت سايلاۋى بولاتىنىن كۇتپەگەنى انىق.
سونىمەن قاتار 30 جىل قوعام مەن مەملەكەت ىشىندە جينالعان «كوڭدى» 3 جىلدا تازالاپ شىعۋ دەگەن ۋتوپيا! قانشا جەردەن باسىڭ التىن بولسىن، ول «كوڭدى» تازالاۋعا ۋاقىت كەرەك. ونىڭ ۇستىنە تولىق بيلىكتى العانىڭا ءبىر جىل تولماسا. تولىق بيلىك توقاەۆتىڭ قولىنا 2022 جىلدىڭ قاڭتارىنان كەيىن وتكەن جوق پا؟ سرازۋ ايتايىن، «تازالاۋعا» قانشا ۋاقىت كەرەك بىلمەيمىن، اۋليە ەمەسپىن! جۇرت مەملەكەت باسقارۋ وڭاي دەپ ويلايدى. كەيبىر پىكىر جازعىشتار ءوز وتباسىن ايتپاعاندا، كىشىگىرىم مەكەمەنى دە باسقارا المايدى. سوندىقتان مەملەكەت باسشىسىنا «اۆگەيدىڭ ات قورالارىن» تازالاۋ ءۇشىن ۋاقىت كەرەك، جانە انا «اكتسيونەرلەر» ءبىلسىن شامالى ۋاقىتتا ولارعا شانس جوق ەكەنىن. ءبىزدىڭ شارۋامىز 2029 جىلعا دەيىن سايلانعان پرەزيدەنتكە كومەكتەسىپ، ازاماتتىق قوعام جاساقتاپ، ەشكىم قازاقستاندى جەكە «جابىق اكتسيونەرلىك قوعام» جاساي المايتىن ينكليۋزيۆتى مەملەكەت قۇرۋ. ونى جاساماساق ەگەمەندىكتەن، تاۋەلسىزدىكتەن ايىرىلامىز، قازاقستان بولشەك-بولشەك بولىپ ىدىرايدى. وندا ەكونوميكا تۇگىل، ءدىنىڭ دە، تىلىڭدە ەشكىمگە كەرەك بولماي قالادى. حالقىمىز بوسىپ كەتەدى. ونداي جاعداي وتكەن تاريحىمىزدا بولدى.
تاعى ءبىر ماسەلە. مەملەكەتتى تازالاۋدان باسقا، ونىڭ جاڭا ارحيتەكتۋراسىن قۇرىپ، ستراتەگيالىق جوسپارلاردى ىسكە اسىرۋ قاجەت. بۇل دا ۋاقىتتى تالاپ ەتەدى. ءوز ءۇيىڭدى جوندەپ، تازالاۋ ءۇشىن قانشا ۋاقىت جوسپار قۇراسىڭ، قانشا ۋاقىت كۇردەلى جوندەۋ جاسايسىڭ؟ ويلانىپ قارا. ەندى سونىڭ ماسشتابىن مەملەكەت دەڭگەيىنە كوتەر. سەنىڭ پروبلەماڭنان مىڭ، ميلليون، ءتىپتى ميلليارد ەسە ۇلكەن شارۋالار. ول 2-3 جىلدا نەمەسە 5 جىلدا بىتە مە؟ انادا ءبىر ءىنىم «قولىما بيلىك بەرسەڭدەر قازاقستاندى 6 ايدا تۇزەيمىن» - دەگەن. ادام ءبىرىنشى ءوزىن تۇزەگەن دۇرىس. سودان كەيىن وتباسى تۇزەلەدى، اۋىلى تۇزەلەدى، اۋدانى تۇزەلەدى، ءوڭىرى تۇزىلەدى، مەملەكەتى تۇزەلەدى!
ەكىنشى ماسەلە توقاەۆقا قاتىستى.
مەملەكەتتىڭ باسشىسى قازاقستاننىڭ ىشكى جانە سىرتقى ساياساتىنا بىردەن-ءبىر جاۋاپ بەرەتىن ادام. مەملەكەت كوسموس ۇشاعىنان دا كۇردەلى زور «ماشينە» ەكەنىن جاقسى بىلەسىڭدەر. بۇل «ماشينەنى» باسقارۋ ءۇشىن ءبىلىم كەرەك، تاجىريبە كەرەك، بىلىكتىلىك كەرەك، ستراتەگيالىق وي كەرەك، «تازالىق» كەرەك، مىنەز كەرەك، سابىرلىق كەرەك، يمان كەرەك! سونىمەن قاتار، الەمدە بەلگىلى تۇلعا، حالىقارالىق قاتىناستىڭ، ونىڭ ىشىندە كورشىلەرىڭنىڭ قىر-سىرىن جەتىك بىلەتىن ادام بولۋىڭ كەرەك.
ەندى وسى شابلونعا توقاەۆتى سالايىق. ول جوعارى وقۋ ورنىن سىرتتاي بىتىرگەن «زاوچنيك» ەمەس، ماسكەۋدىڭ مگيموسىن بىتىرگەن، كاسىبي ديپلومات. تاجىريبە جەتەدى. ەلشى دە بولدى، مينيستردە بولدى، پرەمەر-مينيستردە بولدى، بىرىككەن ۇلتتار ۇيىمىنىڭ باس حاتشىسىنىڭ ورىنباسارىدا بولدى، سەناتتىڭ توراعاسى دا بولدى، پرەزيدەنتتە بولدى. ياعني، مەملەكەت باسقارۋعا قانداي ءبىلىم، بىلىكتىلىك، تاجىريبە قاجەت بارىنەن ءوتتى. ال، اعايىن وسىنداي تاعى ءبىر قازاعىڭ بار ما؟
حالىقارالىق جاعدايعا كەلەيىك. اينالامىزدا «ايۋ» مەن «ايداھار» تورۋىلداپ ءجۇر. توقاەۆ 30 جىلدا بۇرىنعى باسشىلارىمىز بەتىنە قاراي الماعان «ايۋعا» قازاق ديپلوماتياسىنىڭ قانداي ەكەنىن كورسەتتى. ءۇش ءجۇز جىل تىزەسىن باتىرعان ەلدەن ءبىر مەزەتتە ات قۇيرىعىن ءۇزىپ كەتە المايتىنىمىز بەس ەنەدەن بەلگىلى. ولاردا ءوز مۇددەلەرىن قورعاپ، شاماسى كەلگەنشە بىزدەن ايىرىلعىسى جوق. «ايداھاردىڭدا» ءوز ەسەبى بار. تەك وسى ەكەۋىنىڭ ەمەس، باسقا دا ءبىزدىڭ ستراتەگيالىق ارىپتەستەرىمىزدىڭ سىرىنا قاسەكەڭ قانىق. نەنى ايتۋ، نەنى ايتپاۋ، نەنى ىستەۋ، نەنى ىستەمەۋدى بىزدەن جاقسى بىلەدى.
توقاەۆ ءومىر بويى مەملەكەتتىك قىزمەتتە بولدى دەسەك ارتىق ايتپاعان بولارمىز. ال، ەندى ونىمەن بىرگە قىزىمەت جاساعان، ونىڭ بالاسىمەن جاستى كەيبىر شەنەۋنىكتەر ودان باي، مۋلتيميلليونەرلەر! سوندا نە توقاەۆ بيلىكتە ءجۇرىپ بايلىق جيناي المادى ما؟ وندا نەشە ءبىر مۇمكىندىكتەر بولسا دا وعان بارعان جوق قوي! بۇل نەنى كورسەتەدى؟ قاسەكەڭ تازا ادام! نەگە؟ سەبەبى تۇقىمى تەكتى! «تەگى باردان تۇڭىلمە» دەگەن ءسوز بار. ەگەر توقاەۆ بىردەمەنى جەپ قويسا، ۇرلاپ قويسا، ونىڭ وپپونەتتەرى باياعىدا ساحناعا بارلىق كومپروماتتى شىعاراتىن ەدى عوي!
كەزىندە ءبىر عۇلاما ادام ماعان ايتىپ ەدى «ەدىل، مەملەكەت باسقارۋ ءۇشىن، ادام قۇدايعا بايلانۋ كەرەك، ايتپەسە ءناپسىسى دۇنيەنىڭ سوڭىنا كەتىپ قالادى» - دەپ. ياعني، توقاەۆ يمانى بار ادام، قۇدايدان قورقاتىن ادام!
توقاەۆتىڭ مىنەزى بار ادام ەكەنىنىڭ دالەلى – ول سىن ساعاتتا ەلىن تاستاپ قاشىپ كەتكەن جوق. «ولسەم ءوز وردامدا ولەم» - دەپ دايىن تۇرعان ۇشاققا وتىرماي، ەلدى وپاسىزدارعا بەرمەي، حالقىن قانىشەرلەردەن اراشالاپ الىپ قالدى. قارا باسىن ويلاسا، قاشىپ كەتپەي مە؟ ونداي تاجىريبەلەردى باسقا مەملەكەتتەردەن كوردىك قوي. باز بىرەۋلەر «ويباي توقاەۆ حالقىن اتقىزدى، قانىشەر» - دەپ داۋرىعۋدا. ول اتاتىن بولسا ەڭ ءبىرىنشى كوتەرىلگەن ماڭعىستاۋ حالقىن نەگە اتتىرمادى؟ ءبىز، سامات مۋساباەۆپەن 3 قاڭتاردان باستاپ ەل اراسىندا بولدىق، ءبىر وق اتىلعان جوق، ءبىر تامشى قان توگىلگەن جوق. وق اتۋ قانىشەرلەر مەن قاسكويلەر مەملەكەت نىساندارىنا شابۋىلداپ، قارۋسىز ساربازداردى قولدارىنا نە تۇسسە سونىمەن اياۋسىز ۇرىپ، اتىپ، ءولتىرىپ باستاعاندا، سولاردى قۇرتۋ ءۇشىن بۇيرىلدى. سەنبەسەڭدەر سول ۆيدەو ينتەرنەتتە بار، قاراڭدار. بۇل جەردە بيلىكتى توڭكەرگىسى كەلگەن وپاسىزدار بارلىق جاماندىقتى پرەزيدەنتتىڭ موينىنا ءىلىپ، وزدەرىن اق قىلعىلارى كەلەدى. بۇل اقپاراتتىق سوعىستىڭ ادىستەرى!
قازاق مەملەكەتى باعزى زاماننان جاۋلارىمەن الىسىپ-جۇلىسىپ كەلە جاتىر. ورلەگەن كەزدەرىمىز دە بولدى، قۇلدىراعان كەزدەرىمىزدە بولدى. قازاقتىڭ باسى بىرىككەندە جاۋدى جەڭىپ، دامىدىق. ال، اعايىن اراز بولعاندا، باسىمىز بىرىكپەگەندە حان، پاتشالارىمىزدىڭ باسى شابىلىپ، قانعا باتىپ قۇلدىرادىق. وسىنىڭ ءبارىن توقاەۆ بىلمەيدى دەيسىڭدەر مە؟ وعان قازىر ۋاقىت كەرەك. كەزىندە ناپولەونمەن سوعىستا كۋتۋزوۆ ماسكەۋدى تاستاپ كەتتى. استاناسىن بەرىپ كەتكەن قولباسشىنى وپاسىز دەۋگە بولادى. بىراق، ول كۇش جيناپ، اقىلعا سالىپ، سوسىن سوققى بەرىپ، تەك رەسەيدى ەمەس، ەۋروپانى ازات ەتۋگە مۇمكىندىك جاساعان جوق پا؟ باس قولباسشى م.كۋتۋزوۆ باس قالانى بەرگەنمەن، مەملەكەتتى ساقتاپ قالدى. «ۇرىستا ۇتىلىپ، سوعىستا ۇتۋ» دەگەن پرينتسيپ بار. توقاەۆقا سوعان بارىپ وتىر!
يا، سوڭعى سايلاۋعا قاتىستى وزگەرىستەر ونى رەپۋتاتسياسىنا جاقسى ەمەس، ونى ول وتە جاقسى بىلەدى. ول حالىققا بەرگەن ۋادەسىن ورىنداۋ ءۇشىن، ەلىمىزدە باستاعان رەفورمالارىن اياقتاۋ ءۇشىن وسىنداي قادامعا بارىپ وتىر. ايتپەسە قالعان مەرزىمىن اتقارىپ جىبەرىپ، دەمالىسقا كەتپەي مە؟ ءىس باستاۋ ءۇشىن نيەت كەرەك، ونى اتقاراتىن ءبىلىم كەرەك، باستالعاسىن قيىندىقتار بولادى وعان سابىر كەرەك، باستاعان نارسەنى اياعىنا دەيىن جەتكىزۋ كەرەك. مىنە وسى پرينتسيپتەردى قاسەكەڭ جاساپ وتىر! بىراق سابىردىڭدا شەگى بار، ەر كەزەگى ءۇش دەگەن، كەشە ۇكىمەت مۇشەلەرىنە ءۇشىنشى رەت ەسكەرتۋ بەردى. بۇل جەردە ايتا كەتەتىن ءبىر نارسە بار. توقاەۆ بۇكىل قازاقستاندىقتارعا، ونىڭ ىشىندە بارلىق دەڭگەيدەگى شەنەۋنىكتەرگە مۇمكىندىك بەردى. تۇزەلىڭ، تازالانىڭ، ءادىل جۇمىس جاساڭ دەپ. شانس بەردى. ەندى شەنەۋنىك نەمەسە ۇلتتىق كومپانيا قىزىمەتكەرلەرى جۇمىس جاساماسا اياماۋ كەرەك! ءوز وبالدارى وزدەرىنە!
كەشەگى مالىمدەمەدەن كەيىن «ەدىل جاعىمپاز، پرينتسيپتەرىن وزگەرتىپ كەتىپتى» - دەيتىندەر شىقتى. وسى كۇنگە شەيىن بىرەۋگە جاعىمپازدانىپ، لاكەي بولعان ادام ەمەسپىن. مەنىمەن جاقسى ارالاساتىن ازاماتتار بىلەدى. قۇداي ونداي «اۋرۋدان» اۋلاق قىلسىن. ادام سىن ساعاتتا سىنالادى! ادام ءولىم كەلگەندە دە تاڭداۋ جاسايدى! مەنىڭ ماڭدايىما بىرەۋ مىلتىعىن كەزەنىپ «مەنىڭ ءسوزىمدى قالايدا ايت» -دەپ تۇرعان جوق! كەزەنىپ جاتىرسا ونى دا كورەرمىز! ءتۇبى ءبىر ءولىم!
«بۇل دۇنيەنىڭ قۇپياسى – ادىلدىك ءۇشىن كۇرەس!» - دەپ ەر تۇعىرىل بي ايتقان، توقاەۆ ادىلدىك ءۇشىن كۇرەسكە باسىن تىككەن ادام! باس كەسپەك بولسا دا، ءتىل كەسپەك جوق، مەن ءوز جەكە باسىم وسى كىسىنى قولدايمىن! ءادىل قوعام قۇرامىن دەگەن تالپىنىسى ءۇشىن!
اركىم ءوزى شەشىم قابىلداسىن. دۇرىس كەمەگە وتىرا ما، الدە ۇرى كەمەگە وتىرا ما؟ جاعانىڭ تازا جاعىنا شىعا ما، الدە لاس جاعىنا شىعا ما؟ تاڭداۋ ءار ادامنىڭ وزىندە! سەبەبى قۇداي الدىندا ءار قايسىمىز جەكە جاۋاپ بەرەمىز!
P.S. جالپى ادامنىڭ قانداي ەكەنىن بالا سەزگىش. بالا جاقسى ادامعا بارادى، جامان ادامنان قاشادى. مەنىڭ جەتى جاستاعى الان دەگەن تۇڭعىش نەمەرەم بار. ءوزى كورىنگەن اداممەن قارىم-قاتىناس جاسامايدى جانە ۇناتپايدى، وتە ساق! سول نەمەرەم ءوزى كوۆيدەپەن اۋىرىپ، تەمپەراتۋرامەن جاتسا دا پرەزيدەنتتىڭ جولداۋىن تەلەديداردان جىبەرمەيمىن، كورەمىن دەپ كەلىپ قاراعان. وزىنە توقاەۆ ۇنايدى. پرەزيدەنتتىڭ فاناتى دەۋگە بولادى. ەگەر بالانىڭ اق جۇرەگى كىسىنى قابىلداسا، ول ادام تۋرالى قاتەلەسپەگەن بولار!
ەدىل جاڭبىرشين،
ءماجىلىس دەپۋتاتى،
«جاڭا قازاقستان» دەپۋتاتتىق توبىنىڭ تەڭ توراعاسى
