مەملەكەت باسشىسى قاسىم-جومارت توقاەۆ نۇرسۇلتان نازارباەۆتىڭ سىڭىرگەن ەڭبەگى تۋرالى ايتتى، دەپ حابارلايدى «ادىرنا» ۇلتتىق پورتالى.
«ەلىمىز ءۇشىن وسى باستى مەرەكەدە تۇڭعىش پرەزيدەنت نۇرسۇلتان ءابىشۇلى نازارباەۆتىڭ سىڭىرگەن ەڭبەگىن دە اتاپ ءوتۋىمىز كەرەك. ول قازىرگى قازاق مەملەكەتتىلىگىن قالىپتاستىرۋدا شەشۋشى تاريحي ءرول اتقاردى. ونىڭ ەڭبەگى ۇمىتىلماۋى كەرەك. بۇل ءبىزدىڭ بولاشاعىمىز ءۇشىن وتە ماڭىزدى. قازاقتار: «جاقسىنىڭ جاقسىلىعىن ايت» دەيدى. بۇگىنگى كۇندى ءادىل باعالاۋ ءۇشىن وتكەندى دە ءادىل باعالاۋ كەرەك»، - دەدى مەملەكەت باسشىسى رەسپۋبليكا كۇنىنە وراي مەملەكەتتىك ناگرادالاردى تاپسىرۋ سالتاناتى كەزىندە.
ايتا كەتەيىك، رەسپۋبليكا كۇنى نۇرسۇلتان نازارباەۆتىڭ جارلىعىمەن 1995 جىلى قازاندا مەملەكەتتىك مەرەكە بولىپ جاريالاندى. الايدا، 2009 جىلى «قازاقستان رەسپۋبليكاسىنداعى مەرەكەلەر تۋرالى» قولدانىستاعى زاڭعا وزگەرىستەر ەنگىزىلىپ، رەسپۋبليكا كۇنى اتالىپ وتىلمەيتىن بولدى.
