قازاقستاندىق بوكستان ورتا سالماقتاعى الەم چەمپيونى جانىبەك ءالىمحانۇلى (16-0, 11 كو) مەكسيكالىق ساۋل كانەلو الۆارەسكە (62-2-2, 39 كو) قارسى جەكپە-جەك تۋرالى مالىمدەمە جاسادى، دەپ حابارلايدى «ادىرنا» ۇلتتىق پورتالى.
IBF جانە WBO تيتۋلدارىنىڭ يەگەرى مەكسيكالىق چەمپيوننىڭ ونىمەن چەمپيوندىق بەلبەۋ ءۇشىن جۇدىرىقتاسۋدان باس تارتقانىن ايتتى.
«كانەلومەن جەكپە-جەك وتكىزگىم كەلەتىنىن ءبارى بىلەدى، بىراق ول مەنىمەن جۇدىرىقتاسقىسى كەلمەيدى، مۇنى ءبارى بىلەدى»، - دەدى ءالىمحانۇلى الەۋمەتتىك جەلىدە.
ايتا كەتەيىك، بوكسشىلار ءار ءتۇرلى سالماق دارەجەسىندە: ءالىمحانۇلى ورتا سالماقتا (72,5 كيلوگرامعا دەيىن), ال كانەلو ەكىنشى ورتا سالماقتا (76,2 كيلوگرامعا دەيىن) ونەر كورسەتەدى. بۇعان دەيىن جانكۇيەرلەر بوكسشىلارعا بەتپە-بەت كەزدەسۋ وتكىزۋدى ۇسىندى. ولاردىڭ كەيبىرەۋلەرى كانەلو جەكپە-جەكتىڭ ءفاۆوريتى دەپ سانايدى.
جانىبەك ءالىمحانۇلى كاسىبي مانسابىن 2016 جىلى باستاپ، 11-ءشى جەكپە-جەگىندە ورتا سالماقتا (72,5 كيلوگرامعا دەيىن) WBO تۇجىرىمى بويىنشا الەم چەمپيونى اتاعىن جەڭىپ الدى. 2023 جىلدىڭ قازان ايىندا ءالىمحانۇلى تەحنيكالىق نوكاۋتپەن نەمىس ۆينچەنتسو گۋالتيەريدى جەڭىپ، IBF بەلبەۋىن يەلەندى. ميحايلوۆيچكە قارسى جەكپە-جەكتە ءالىمحانۇلى ءبىرىنشى رەت اتاعىن قورعاپ، 16 جەكپە-جەكتە 16-شى جەڭىسىنە قول جەتكىزدى.
ساۋل كانەلو الۆارەس كاسىپقوي رينگكە العاش رەت 2005 جىلى شىققان. سودان بەرى مەكسيكالىق ءارتۇرلى سالماق ساناتتارىندا بىرنەشە رەت تيتۋلداردى جەڭىپ الىپ، سۋپەر ورتا سالماقتا (76,2 كەلى) ءابسوليۋتتى الەم چەمپيونى اتاندى. ول قازاقستاندىقتارعا 2017-2022 جىلدار ارالىعىندا «تريلوگيا» وتكىزگەن ايگىلى گەننادي گولوۆكيننىڭ باسەكەلەسى رەتىندە تانىمال. ءبىرىنشى جەكپە-جەگىندە بوكسشىلار تەڭ تۇسسە، ەكىنشى جانە ءۇشىنشى كەزدەسۋدە مەكسيكالىق جەڭىسكە جەتتى. 15 قىركۇيەككە قاراعان ءتۇنى سوڭعى جەكپە-جەگىندە ساۋل الۆارەس امەريكالىق ەدگار بەرلانگانى تورەشىلەردىڭ شەشىمىمەن جەڭىپ، WBC, WBA جانە WBO تيتۋلدارىن ساقتاپ قالدى.
