جوعارى وقۋ ورنىنا تۇسە الماي قالعان ءساتسىز وقيعادان كەيىن باستاعان كاسىبى ناسىبىنە اينالعان سامعاۋ ءناسىپحانۇلى ەتىكشىلىك ونەردىڭ قىر-سىرى جايىنداعى ويلارىمەن بولىسەدى.
قۇستار تىزبەگى جىلى جاققا قايتىپ، كۇز كەلدى. ەلىمىزدىڭ سولتۇستىك ايماقتارىندا قار جاۋىپ، جۇرتتار اق قاردى توسەك ەتىپ جۇرسە، وڭتۇستىك ايماقتا دا جاعداي ءماز بولماي، بۇلتتار مۇڭايىپ، جاسىن توگىپ جاتىر. كۇننىڭ سۋىعىندا جىلى كيىمنەن بولەك، اياعىڭىزعا جىلى اياق كيىم العانىڭىز دا ابزال. «اياق كيىم» دەمەكشى ۇلتتىق برەندتە تىگىلگەن اياق كيىمدەر تۋرالى ەستىمەگەن ەل دە كوپ. سامعاۋ ءناسىپحانۇلى – التايدان اتاجۇرتقا كەلىپ، وسى كۇنى ەتىك سالاسىنا ۇلەس قوسىپ وتىرعان تۇلعالاردىڭ ءبىرى.
- سامعاۋ مىرزا، جالپى وسى سالاعا قالاي كەلدىڭىز؟ نە تۇرتكى، نە سەبەپشى بولدى، نەگە ەتىك سالاسى؟
- وسى سالاعا 2010-11 جىلدارى كەلدىم. ءبىزدىڭ اتالارىمىز ەتىكشى بولعان سول كىسىلەر سەبەپشى بولدى. ودان كەيىن تەستتەن وتپەي قالعانىم تاعى بار، ءوزىمىزدىڭ اتا كاسىبىمىزدى باستاۋعا تۋرا كەلدى. نەگىزى وسى كاسىپكە تەستتەن وتپەي قالۋىم تىكەلەي سەبەپشى بولدى جوعارعى وقۋ ورنىنا تۇسە المادىم. سودان كەيىن وسى اتا كاسىپتى باستاۋدى ءجون كوردىم.
- وسى كاسىپتى جۇرگىزۋ كەزىندە قانداي قىزىقتار، قانداي قيىنشىلىقتار باسىڭىزدان ءوتتى؟
- اياق كيىم كاسىبىنە كەلگەلى 14 جىلدان اسا ۋاقىت بولىپتى، قيىندىعى – مىنا نارسە عوي، ءتۋفليدى تىگۋ ونەرى – ول 10 مىڭ ساعات ارناۋ كەرەك دەگەن سياقتى ول – بولەك ونەر. كروسسوۆكا تىگۋ بولەك، ايەلدەر اياق كيىمىن تىگۋ ول – بولەك ونەر. ول جەردە ديزاين بار، ول جەردە ماتەماتيكا بار، ول جەردە گەومەتريا بار، ول جەردە سىزۋ ساباقتارى بار. وسىنىڭ بارلىعىن جيناپ بولدىم دەگەن كەزدە، ەندى الدىڭىزدان تەرىنىڭ دۇنيەلەرى شىعادى.
وندايدا تەحنولوگ بولۋىڭىز كەرەك.
قانداي تەرى، قانداي جەلىم، قانداي تابان جانە ونىڭ قۇرامىن انىقتاۋ كەرەك. ول ونىڭ ىشىندە قىستىق جانە جازدىق بولىپ بولىنەدى. وسىنىڭ بارلىعىنان وتكەن كەزدە الدىڭىزدان ساتۋ ماسەلەسى كەزدەسەدى، الدىڭىزدان ادام باسقارۋ، ماركەتينگ ءىسى كەزدەسەدى.
سايىپ كەلگەندە، وندىرىسپەن اينالىسۋ دەگەن – ۇلكەن جۇمىس ەكەن. ونىڭ ءوز قىزىعى مەن قيىندىعى بار.
- ەگەر دە ەتىك كاسىبىن باستاۋ مۇلدەم ويىڭىزعا كەلمەگەندە، قازىر سامعاۋ كىم بولار ەدى؟
- ەتىك تىگۋ كاسىبىن مەن باستاماعان كەزدە ينجەنەر بولىپ، كولىك جاساۋ سالاسىندا جۇمىس ىستەيمىن بە دەپ ويلايمىن. بالكىم سۋرەتشى بولاتىن با ەدىم دەيمىن. ءتىپتى بولماسا، سپورتشى بولار ەدىم. مەن كوبىرەك سول جاقتاردا كوپ دايىندالدىم، كوپ جۇگىردىم. سپورتقا جاقىن بولدىم.
- شىعارىپ وتىرعان تاۋارلارىڭىزدى جۇرت قىمباتسىناتىنىن بايقادىم. ول ادامدارعا نە ايتاسىز؟
- جوق، ءبىزدىڭ شىعارىپ وتىرعان اياق كيىمدەرىمىز قىمبات ەمەس. قولجەتىمدى باعادا، 5 مىڭ مەن 30 نەمەسە 35 مىڭ تەڭگە اراسىندا. ول قولجەتىمدى دەپ ويلايمىن. ەشقانداي قىمبات ەمەس، كەرىسىنشە ءبىز وسىنى ارزانداتۋ جاعىن ويلاپ ءجۇرمىز.
- قازاقستانداعى اياق كيىم ءوندىرىسىن قالاي باعالايسىز؟
- قازاقستانداعى اياق كيىم شىعارۋ ءوندىرىسى «كاتاستروفا»، سونداي ءبىر قيىن جاعدايدا. 1-2 پايىز دا قامتاماسىز ەتە المايمىز، سىرتتان ناقتى، رەسمي تىركەلگەن ستاتيستيكا بويىنشا 60 ملن شاماسىندا اياق كيىم كەلەدى. تىركەلمەگەنى قانشاما؟!
وزبەكستاننىڭ وزىنەن ءبىر جىلدا 4,5 ملن جۇپ اياق كيىم كەلەدى. بىزدە ءوندىرىستى كلاستەر قىلىپ جاساۋعا نازار اۋدارمايدى، مەملەكەت قولداپ وتىرعان جوق. ول ءبىر جامانداعانىم ەمەس، جاي عانا كەمشىلىگىن ايتىپ جاتىرمىن. ەگەر دە وسى كەمشىلىككە ماعان «كىرپىش بول» دەسە، وعان دا مەن دايىنمىن.
– ءسىز تۋرالى فاكتىلەردەن پرەزيدەنتكە تۋفلي تىگىپ سىيعا تارتقانىڭىزدى ەستىدىم، سول تۋرالى ايتا كەتسەڭىز...
– مەن ەشقانداي دا پرەزيدەنتكە تۋفلي تىگىپ سىيعا تارتقان ەمەسپىن. مەن سول كىسىنىڭ تۋفليلەرىن، اياق كيىمدەرىن تىگەمىن. مەن بۇل تۋرالى ناقتى، تەرەڭىرەك ايتا المايمىن. سەبەبى ارادا كەلىسىمدەر بار.
– ءسىزدىڭ شىعارىپ جۇرگەن توۆارلارىڭىز برەندكە اينالعانى بايقالادى. قاراپايىم حالىقتان بولەك كليەنتتەرىڭىزدىڭ اراسىندا باسقا دا بەلگىلى ادامدار بار سياقتى...
– مەن جاڭادان قالىپتاسقان كەزىندە ديماش قۇدايبەرگەنوۆتىڭ كونتسەرتتىك اياق كيىمدەرىن تىكتىم. ودان باسقا قوعام قايراتكەرلەرى بار، دوسىمجان تاڭاتاروۆ، بەكبولات تىلەۋحانوۆ اعالارىمىز بار، تورەعالي تورەالى، زاتتىبەك كوپبوسىنۇلى جالپى ايتقاندا انشىلەر مەن جۇلدىزداردىڭ ءبىرازى كيدى دەسەم دە بولادى. جالپى قازاقستاننىڭ ۇلتتىق كيىم ۇلگىسىنە ءبىر كىسىدەي ۇلەس قوستىم دەپ ايتا الامىن. العاش قالىپتاسقانىمىزدا بالعىنبەك يماشوۆ ءتارىزدى اعالارىمىز ءبىزدىڭ ەتىكتى كيىپ ءجۇردى. «ۇلتتىق اياق كيىم» دەسە، قازاقتىلدى اۋديتوريا ءبىزدىڭ شەبەرحانامىزدى اتاي الادى.
- سۇحبات بەرگەنىڭىز ءۇشىن راقمەت!
يسلام ادەن
