اتا-انالار مەكتەپكە بالالارىن حيدجاپپەن كىرگىزۋدى بولماسا اقىلى مەكتەپتە ءبىلىم الۋى ءۇشىن بيۋدجەتتەن ارنايى اقشا ءبولىپ، وقىتۋدى سۇرادى. ولار بالالارىن قىمبات مەكتەپتەردە وقىتۋعا قاراجاتتارى جەتپەيتىنىن ايتىپ، "مەملەكەت بالالاردىڭ ءبىلىم الۋى ءۇشىن اقشا بولەدى، سول اقشانى اقىلى مەكتەپتەرگە بيۋدجەتتەن تولەسىن" دەدى.
- بيلىك ءوزى باس بولىپ، اتا زاڭدى بۇزىپ وتىر. قازاقستاندا مينيسترلىكتىڭ ەرەجەسى اتا زاڭنان جوعارى، - دەدى كونستيتۋتسيالىق قۇقىقتارى شەكتەلىپ جاتقانىن العا تارتقان اتا-انالاردىڭ ءبىرى بەرىك سۇلەكەنوۆ.
كەلگەندەر اراسىندا "بالالارىمىز مەكتەپكە دەيىن ورامالمەن بارادى، مەكتەپتىڭ جانىندا شەشەدى، ماجبۇرلىكپەن ىستەپ وتىرمىز، بىزگە قىسىم جاسالىپ جاتىر" دەپ شاعىمدانعاندار كوپ بولدى. اتا-انالار اراسىندا تەك اقتوبە قالاسى عانا ەمەس، تەمىر اۋدانىنداعى شۇبارشي اۋىلىنان، مۇعالجار اۋدانىنداعى قاندىاعاش قالاسىنان كەلگەن اتا-انالار دا بولدى.
جينالىس زالىندا نارازى اتا-انالاردىڭ سۇراقتارىنا اقتوبە وبلىسى اكىمىنىڭ ورىنباسارى مارات توعجانوۆ، وبلىستىق ءبىلىم باسقارماسى باسشىسىنىڭ ورىنباسارى نۇرگۇل بەرتىلەۋوۆا، وبلىستىق ءدىني باسقارما باسشىسى الىمبەك تۇرداليەۆ جاۋاپ بەردى. ولار "زايىرلى مەملەكەتتىڭ ەرەجەلەرىن ساقتاۋ قاجەتتىگىن، وقۋشىلاردىڭ مەكتەپ فورماسىن ساقتاۋ ماڭىزدىلىعىن" ايتىپ، ءتۇسىندىردى.
شامامەن بىرنەشە ساعاتقا سوزىلعان تالقىلاۋ كەزىندە ەكى جاق ورتاق مامىلەگە كەلە المادى. جينالىس سوڭىندا اتا-انالار ەل پرەزيدەنتى قاسىم-جومارت توقاەۆقا ۇندەۋ جولدايتىنىن ايتىپ، تاراستى.
وبلىستىق ءبىلىم باسقارماسىنىڭ دەرەگىنشە، 2018-2019 جىلعى وقۋ جىلىندا اقتوبە قالاسىندا "ورامال داۋىنا" بايلانىستى جەتى بالا سىنىپتان سىنىپقا كوشپەي قالعان. جىل سوڭىنا تامان "سىنىپقا كوشپەي قالۋ قاۋپى تۋىنداعان سوڭ" ءبىر بالا ورامالىن شەشىپ، مەكتەپكە كىرگەن. 11 بالا ءوز بەتىنشە رەسەيلىك ونلاين مەكتەپ ارقىلى ءبىلىپ العان. بىرنەشە بالا وزگە وبلىسقا كوشىپ كەتكەن.
2016 جىلى قاڭتاردا ءبىلىم جانە عىلىم مينيسترلىگى بىرىڭعاي مەكتەپ فورماسى ەرەجەسى تۋرالى №26 بۇيرىقتى قابىلدادى.
بۇل ەرەجە اقتوبە، باتىس قازاقستان، ماڭعىستاۋ جانە وڭتۇستىك قازاقستان وبلىستارىنداعى كەيبىر مەكتەپ پەن اتا-انالار اراسىنداعى داۋ-دامايعاسەبەپشى بولدى.
قابىلدانعان ەرەجەگە ساي، مەكتەپ وقۋشىلارى پيدجاك، كەۋدەشە، جەيدە، شالبار، كلاسسيكالىق جەيدە (قىس كەزىندە قالىڭ كەۋدەشە، سارافان) كيۋى كەرەك. مەكتەپ فورماسىنا قاتىستى بۇل تالاپتاردى مەنشىك نىسانىنا قاراماستان ەلدەگى جالپى ءبىلىم بەرۋ مەكەمەلەرىنىڭ بارلىعى بىردەي ورىنداۋعا مىندەتتى.
دەرەككوز: azattyq.org
"ادىرنا" ۇلتتىق پورتالى
