اقش-تىڭ پەنسيلۆانيا شتاتىندا تۇرىپ جاتقان فەتۋللاحچي لاڭكەستىك ۇيىمىنىڭ جەتەكشىسى فەتحۋللا گۇلەن 84 جاسقا قاراعان شاعىندا قايتىس بولدى، دەپ حابارلايدى «ادىرنا» ءتىلشىسى CNN-گە سىلتەمە جاساپ.
ول 20 قازان كۇنى پەنسيلۆانياداعى كلينيكادا جان تاپسىرعان. تۇرىك ءدىني ليدەرىنىڭ ءباسپاسوز حاتشىسى سوڭعى كەزدەرى گۇلەننىڭ دەنساۋلىعى سىر بەرگەنىن مالىمدەدى. قوعام قايراتكەرى قانت ديابەتى جانە دەمەنتسيا دەرتىنە شالدىققان.
ايتا كەتەيىك، فەتحۋللا گۇلەن – تۇرىكتىڭ قوعام جانە ءدىني قايراتكەرى، جازۋشى، اقىن، ءدىن ۋاعىزشىسى. 1999 جىلى اقش-قا قونىس اۋدارعان قايراتكەر كەزىندە ەردوعاننىڭ وداقتاسى بولعان. ەردوعان مەن ونىڭ ءدىني كونسەرۆاتيۆتىك ادىلەت جانە دامۋ پارتياسىنىڭ 2002 جىلى بيلىككە كەلۋىنە كومەكتەسكەن. الايدا وداقتاستار كوپ ۇزاماي بيلىكتى ءبولىسۋ داۋىنا بايلانىستى ارازداسىپ قالعان بولاتىن. سول جىلى مامىر ايىندا گۇلەن قوزعالىسى تۇركيادا تەرروريستىك ۇيىم بولىپ جاريالاندى. ول مەملەكەتتىڭ زايىرلى سيپاتىن وزگەرتۋ ءۇشىن توڭكەرىس جاساماق بولدى دەگەن ايىپپەن قۋعىندالعان ەدى. الايدا بۇل ايىپ دالەلدەنبەدى.
قازاقستان مۇسىلماندارىنىڭ ءدىني باسقارماسىنىڭ ۇستانىمى بويىنشا، گۇلەنشىلەر جاماعاتى سايد نۇرسي يدەيالارىن باسشىلىققا الادى. «حيزمەت» قوزعالىسى الەمنىڭ 140-تان اسا ەلىندە مەكتەپ اشقان.
بۇعان دەيىن تۇركيا پرەزيدەنتى رەجەپ ەردوعان ەلىمىزدەگى قازاق-تۇرىك ليتسەيىن تىكەلەي گۇلەنمەن بايلانىستىرعان ەدى. باسشى بۇل ءبىلىم وردالارى ءدىن ۋاعىزشىسىنىڭ ءىلىمىن وقىتىپ جاتىر دەپ مالىمدەگەن بولاتىن. سول تۇستا مەكتەپتەرگە تەكسەرىس جۇرگىزىلدى. قازىرگى تاڭدا قازاق-تۇرىك ليتسەيلەرىنىڭ اتاۋى «ءبىلىم-يننوۆاتسيا ليتسەيى» دەپ وزگەرتىلدى. ءبىلىم ورداسى ءوز جۇمىسىن توقتاتپادى.
