استانادا پوليتسەيلەر سەريالىق الاياقتىق جاسادى دەگەن كۇدىكپەن پاۆلودار قالاسىنىڭ تۇرعىنىن ۇستادى. ايەل جوق جيھازدى ساتۋمەن اينالىسقان، دەپ حابارلايدى «ادىرنا» ۇلتتىق پورتالى Polisia.kz سايتىنا سىلتەمە جاساپ.
ءتارتىپ ساقشىلارىنىڭ ايتۋىنشا، پاۆلودارلىق تۇرعىن ساتىپ الۋشىلارعا الدىن-الا تولەم جاساۋدى سۇراعان.
«پاۆلودار قالاسىنىڭ تۇرعىنى جوق جيھاز ساتۋمەن اينالىساتىن «بيزنەس» ۇيىمداستىردى. 30 جاستاعى قىز سايتتا ارزان تۇرمىستىق زاتتاردى ساتۋ تۋرالى حابارلاندىرۋلار ورنالاستىرىپ، ساتىپ الۋشىلارعا ءموبيلدى بانكينگ ارقىلى 30 مىڭ تەڭگەگە دەيىن الدىن-الا تولەمدى اۋدارۋدى ۇسىنعان. بۇگىنگى كۇنى پوليتسياعا 10-عا جۋىق الدانعان ازامات جۇگىنىپ، كۇدىكتىگە قاتىستى قىلمىستىق ءىس قوزعالدى»، - دەلىنگەن حابارلامادا.
پوليتسەيلەر ازاماتتارعا قىراعى بولۋدى، ساقتىق تانىتۋدى جانە جەكە بانكتىك دەرەكتەرىن، سونداي-اق SMS حابارلامالارىنىڭ قۇپيا ساقتاۋدى ەسكەرتەدى.
«كۇماندى ساتۋشىلاردان تاۋارلار مەن قىزمەتتەردى ساتىپ الماڭىز، الەۋمەتتىك جەلىلەر مەن مەسسەندجەرلەردە ەكى فاكتورلى اۋتەنتيفيكاتسيانى قولدانىڭىز، ءسىزدىڭ جەكە جيناقتارىڭىز بەن جەكە دەرەكتەرىڭىزدىڭ قاۋىپسىزدىگى ءسىزدىڭ قولىڭىزدا ەكەنىن ەستە ساقتاڭىز»، - دەپ اتاپ ءوتتى پوليتسيا.
ينتەرنەتتەگى الاياقتىق فاكتىلەرىنىڭ كوبەيۋىنە بايلانىستى ەلوردادا «الاياقتىقتى توقتاتۋ» وپەراتسياسى جۇرگىزىلۋدە. قۇقىق قورعاۋ ورگاندارىنىڭ مالىمەتىنشە، قالادا جىل باسىنان بەرى 4 مىڭعا جۋىق ينتەرنەت الاياقتىق فاكتىسى تىركەلگەن.
