قازاقستانداعى "مۇسىلماندىق اتوم بومباسى" ءۇشىن قاراجات ۇسىنعاندار تۋرالى مالىمەت جەلىلەردە قايتا تاراپ جاتىر، دەپ حابارلايدى "ادىرنا" ۇلتتىق پورتالى.
ءبىر كەزدە "حابار" ارناسىنان بەرىلگەن سۇحبات ۇزىندىلەرى Threads جەلىسىندە جاريالانعان. جازبادا ەلدىڭ بۇرىنعى پرەزيدەنتى نۇرسۇلتان نازارباەۆ پەن بۇرىنعى سىرتقى ىستەر ءمينيسترى قانات ساۋداباەۆتىڭ ءسوزى بولعان.
باق بەتتەرىندە جاريالانعان مالىمەتتەردە 1992 جىلدىڭ باسىندا قازاقستاننىڭ سىرتقى ىستەر مينيسترلىگىنە ديپلوماتيالىق ارنالار ارقىلى تۇسكەن الدەبىر حات تۋرالى ايتادى. وندا ءبىر كەزدەگى ليۆيا باسشىسى مۋاممار قاددافي قازاقستان اۋماعىندا ورنالاسقان يادرولىق قارۋدى ساقتاپ، ونى «العاشقى مۇسىلمان اتوم بومباسى» رەتىندە قاراستىرۋدى ۇسىنعانى ايتىلادى. سونىمەن قاتار ليۆيا تاراپى قارۋدى ۇستاۋ ءۇشىن كوپ ميلليارد دوللار كولەمىندە قارجىلاي كومەك بەرۋگە دايىن ەكەنىن بىلدىرگەن.
ەكس-پرەزيدەنت نۇرسۇلتان نازارباەۆ سۇحبات بارىسىندا وعان پالەستينا كوسەمى ياسير ارافات كەلگەنىن ايتتى.
«سول كەزدە سىرتقى ىستەر ءمينيسترى قاسىم-جومارت توقاەۆ بولعان. وعان وسى حات كەلىپ تۇسكەن. كەيىن ياسير ارافات كەلىپ: “مەن مۇنى ءوز اتىمنان ايتىپ وتىرعان جوقپىن، ءسىزدىڭ دوستارىڭىزدىڭ اتىنان كەلدىم”، – دەدى. ونىڭ ايتۋىنشا، ونى مۋاممار قاددافي قازاقستانداعى يادرولىق قارۋ جاعدايىن ءبىلۋ ءۇشىن جىبەرگەن ەكەن. ارينە، مەنىڭ ويىمدا بۇل زىمىرانداردى ساتۋ دەگەن بولعان جوق. مەن جاي عانا: ولاردى ۇستاۋ وتە قىمبات، قازاقستان وعان شىداي المايدى دەدىم،"- دەيدى نازارباەۆ.
“قانشا اقشا قاجەت؟” – دەپ سۇرادى. ول كەزدە مەن اقشانىڭ كولەمىن، اسىرەسە دوللارمەن ەسەپتەگەندە، ناقتى ەلەستەتە المايتىنمىن. سودان ازىلدەپ، ويىما كەلگەن ساندى ايتىپ: 20 ميلليارد دوللار دەدىم. جاي عانا ايتا سالدىم، ونى ءازىل رەتىندە قابىلدايدى دەپ ويلادىم»، – دەپ ەسكە الادى نۇرسۇلتان نازارباەۆ ياسير ارافاتپەن بولعان اڭگىمەسىن.
قازاقستاننىڭ بۇرىنعى سىرتقى ىستەر ءمينيسترى قانات ساۋداباەۆتىڭ بەينەجازباداعى مالىمەتىنشە، الماتى اۋەجايىنا ءىشى «جاسىل دوللارعا» لىق تولى Boeing 747 ۇشاعى كەلىپ قونعان. بۇل قاراجات قازاقستاننىڭ يادرولىق كەشەنىن ارى قاراي ۇستاپ تۇرۋىنا جانە دامىتۋىنا ارنالعان العاشقى كومەك رەتىندە قاراستىرىلعان-مىس.
سۇحبات بارىسىندا 1992 جىلدىڭ باسىندا مۋاممار قاددافي قازاقستاننىڭ ءبىرىنشى پرەزيدەنتى نۇرسۇلتان نازارباەۆقا ارنايى حات جولداعان. حاتتىڭ نەگىزگى مازمۇنىندا قازاقستان اۋماعىنداعى كەڭەس وداعىنان قالعان يادرولىق قارۋدى رەسەيگە بەرمەي، ەلدە قالدىرۋ جانە بۇل قارۋدى الەمدەگى «تۇڭعىش مۇسىلماندىق اتوم بومباسى» رەتىندە جاريالاۋ تۋرالى ايتىلادى.
نازارباەۆ پەن ساۋداباەۆ ايتقان دەرەكتەردى بۇگىنگە دەيىن ەشكىم جوققا شىعارعان جوق. بىراق ونىڭ راستىعىن دالەلدەيتىن باسقا قوسىمشا مالىمەتتەر دە جاريالانباعان.
