جامبىل وبلىسىندا سوبر ينسپەكتورى قازا تاپتى. بۇل اقپاراتتى وبلىستىق پوليتسيا دەپارتامەنتى راستادى، دەپ حابارلايدى "ادىرنا".
قايعىلى وقيعا قورداي اۋدانىندا جەدەل دەن قويۋ ارنايى جاساعىنىڭ (سوبر) كازارما عيماراتىندا بولعان. وقيعا قىزمەتتىك عيماراتتىڭ دالىزىندە ورىن العان.
الدىن الا مالىمەت بويىنشا، 1995 جىلى تۋعان قىزمەتكەر تابەلدىك قارۋدان وق جاراقاتىن العان. زارداپ شەككەن ازامات اۋىر جاعدايدا اۋداندىق ورتالىق اۋرۋحاناعا شۇعىل جەتكىزىلگەن.
دارىگەرلەردىڭ بارلىق كۇش-جىگەرىنە قاراماستان، ول ەسىن جيماستان جانساقتاۋ بولىمىندە كوز جۇمدى.
جامبىل وبلىستىق پوليتسيا دەپارتامەنتىنىڭ مالىمەتىنشە، اتالعان فاكتى بويىنشا قازاقستان رەسپۋبليكاسى قىلمىستىق كودەكسىنىڭ 105-بابى بويىنشا سوتقا دەيىنگى تەرگەپ-تەكسەرۋ باستالدى.
قازىرگى ۋاقىتتا وقيعانىڭ ءمان-جايىن جان-جاقتى، تولىق ءارى وبەكتيۆتى انىقتاۋعا باعىتتالعان قاجەتتى تەرگەۋ ارەكەتتەرى جۇرگىزىلۋدە، – دەپ حابارلادى ۆەدومستۆو رەداكتسيانىڭ ساۋالىنا بەرگەن جاۋابىندا.
سونداي-اق قىزمەتتىك تەكسەرۋ تاعايىندالدى.
الدىن الا مالىمەتتەر بويىنشا, ءىس قىزمەتپەن بايلانىستى ەمەس. قازاقستان رەسپۋبليكاسى قىلمىستىق-پروتسەستىك كودەكسىنىڭ 201-بابىنا سايكەس وزگە مالىمەتتەر جاريا ەتىلمەيدى، - دەپ اتاپ ءوتتى وبلىستىق پد.
