الماتىدا وتباسىلىق جانجال ادام ولىمىمەن اياقتالدى، دەپ حابارلايدى “ادىرنا” ۇلتتىق پورتالى.
قايعىلى وقيعا برۋسيلوۆسكي كوشەسىندەگى تۇرعىن ۇيلەردىڭ بىرىندە تۇنگى ساعات 03:00 شاماسىندا بولعان.
الدىن الا مالىمەت بويىنشا، پاتەردە تۋىنداعان جانجال كەزىندە 34 جاستاعى ەر ادام 59 جاستاعى وگەي اكەسىنە ءاسۇي پىشاعىمەن بىرنەشە رەت سوققى جاساعان. وقيعا ورنىنا شاقىرىلعان جەدەل جاردەم قىزمەتى زارداپ شەككەن ازاماتتىڭ ءومىرىن ساقتاپ قالۋعا تىرىسقانىمەن، ول كوپتەگەن پىشاق جاراقاتى مەن كوپ قان جوعالتۋدان كوز جۇمدى.
الماتى قالالىق پوليتسيا دەپارتامەنتىنىڭ مالىمەتىنشە، جەدەل-ىزدەستىرۋ شارالارى بارىسىندا كۇدىكتى ۇستالدى. ول – مارقۇمنىڭ 34 جاستاعى وگەي ۇلى.
«الدىن الا مالىمەت بويىنشا، وتباسىلىق جانجال كەزىندە كۇدىكتى جابىرلەنۋشىگە ءاسۇي پىشاعىمەن بىرنەشە رەت سوققى جاساعان. وقيعانىڭ ءبىر نۇسقاسى رەتىندە جانجالدىڭ كۇدىكتىنىڭ اناسىمەن بولعان كيكىلجىڭنەن كەيىن تۋىنداعانى قاراستىرىلىپ جاتىر. بۇل جاعدايلاردىڭ بارلىعى تەرگەۋ بارىسىندا جان-جاقتى تەكسەرىلەدى»، – دەپ حابارلادى پوليتسيا.
اتالعان فاكتى بويىنشا ادام ءولتىرۋ بابى بويىنشا قىلمىستىق ءىس قوزعالدى. كۇدىكتى ۋاقىتشا ۇستاۋ يزولياتورىنا قامالدى. قازىر وقيعانىڭ بارلىق ءمان-جايىن انىقتاۋعا باعىتتالعان تەرگەۋ امالدارى جۇرگىزىلىپ جاتىر.
