تۇركىستان وبلىسى، جەتىساي اۋدانىندا 8 ءتىل بىلەتىن جاس پوليگلوت تۇرادى. ونىڭ اتى-ءجونى – ساچيدي شاحناز رازانديقىزى. شاحناز تۇركىستان وبلىستىق يران ەتنومادەني بىرلەستىگىنىڭ مۇشەسى. ول 1999 جىلى اباي اۋىلدىق وكرۋگىنە قاراستى جۇزىمدىك اۋىلىندا دۇنيەگە كەلگەن. اۋىلداعى №21 يۋ.گاگارين اتىنداعى جببم-دە 2017 جىلى مەكتەپتى تامامداعان. 2018-2022 جىلدار ارالىعىندا ءا.قۋاتبەكوۆ اتىنداعى حالىقتار دوستىعى ۋنيۆەرسيتەتىندە ەكى شەت ءتىلى ماماندىعى بويىنشا ءبىلىم العان.
شاحناز قازىرگى تاڭدا سەگىز ءتىلدى جەتىك مەڭگەرگەن. التى ءتىلدى بالا كەزدەن ءوز قىزىعۋشىلىعىمەن ۇيرەنگەن. اتاپ ايتساق، قازاق، ورىس، وزبەك، پارسى، تۇرىك، ازەربايجان تىلدەرى. ال اعىلشىن ءتىلى مەن قىتاي ءتىلىن ۋنيۆەرسيتەت قابىرعاسىندا وقىپ ءجۇرىپ ۇيرەنگەن. 2023-2024 جىلدارى ارالىعىندا «شابىت» شىعارماشىلىق ورتالىعىندا «جاستار پراكتيكاسى» باعدارلاماسى ارقىلى جۇمىس ىستەگەن.
– «ءبىر ءتىل بىلسەڭ – ءبىر ادامسىڭ، ەكى ءتىل بىلسەڭ – ەكى ادامسىڭ» دەگەن ءسوز بار. مەن شەت تىلدەرىن ۇيرەنۋگە بالا كەزىمنەن قىزىقتىم. ويتكەنى ءتىل ارقىلى ادام وزگە ەلدىڭ مادەنيەتىن، ۇلتتىق ەرەكشەلىگىن تانىپ-ءبىلىپ، تانىم كوكجيەگىن كەڭەيتە تۇسەدى. الەمگە ايگىلى عۇلاما بابامىز ءال-فارابي جەتپىسكە جۋىق ءتىل بىلگەن. ءتىل ءبىلۋىنىڭ ارقاسىندا رۋحاني ءىلىم-ءبىلىم قالىپتاستىرعان. شەت ءتىلىن بىلگەن جاقسى، ارينە. دەگەنمەن، قازاقستاندا تۇراتىن ازاماتتارعا ايتارىم، ۇلتىڭىزعا، جاسىڭىزعا قاراماي، مەملەكەتتىك ءتىلدى ۇيرەنۋگە ۇمتىلىڭىز دەگىم كەلەدى. بۇل – وتانعا، ەلگە دەگەن قۇرمەتتىڭ بەلگىسى ءارى مەملەكەتتىك ءتىل بارلىعىمىزدى بىرىكتىرەدى. پرەزيدەنتىمىز قاسىم-جومارت كەمەلۇلى توقاەۆ تاياۋدا وتكەن قازاقستان حالقى اسسامبلەياسىنىڭ سەسسياسىندا «مەن قازاق ءتىلى ۋاقىت وتە كەلە ەتنوسارالىق قاتىناس تىلىنە اينالاتىنىنا سەنىمدىمىن. ءبىز بىرتىندەپ وسىعان كەلە جاتىرمىز»، دەدى. سوندىقتان مەملەكەتتىك ءتىلدى ۇيرەنۋ – ءار قازاقستاندىقتىڭ ازاماتتىق پارىزى دەپ ەسەپتەيمىن، – دەيدى پوليگلوت قىز.
شاحنازدىڭ ەندىگى ارمانى – قىتاي ەلىندە ءبىلىمىن جەتىلدىرىپ، تۋعان جەرگە ورالىپ، ءوزىنىڭ جەكە وقۋ ورتالىعىن اشۋ. مەكتەپتە ۇستازدىق ەتىپ، وقۋشىلاردى ءبىلىم نارىمەن سۋسىنداتقىسى كەلەدى.
ەسكە سالا كەتسەك، بۇگىنگى تاڭدا تۇركىستان وبلىسىنداعى اسسامبلەيا قۇرىلىمدارىنىڭ ۇيىتقى بولۋىمەن مەملەكەتتىك ءتىلدىڭ مارتەبەسىن كوتەرەتىن ءىس-شارالار وتۋدە. ءوڭىردىڭ بارلىق اۋدان، قالالارىندا مادەنيەت جانە تۋريزم باسقارماسىنا قاراستى ءتىل ورتالىقتارى جۇمىس ىستەيدى. وتكەن جىلى وسى كۋرستارعا 4 مىڭعا جۋىق ادام قامتىلدى. وبلىستاعى ەتنوس وكىلدەرىنىڭ 92 پايىزى قازاق ءتىلىن جەتىك بىلەدى، قۇرمەت تۇتادى.
