Túrkistan oblysy, Jetisaı aýdanynda 8 til biletin jas polıglot turady. Onyń aty-jóni – Sachıdı Shahnaz Razandıqyzy. Shahnaz Túrkistan oblystyq ıran etnomádenı birlestiginiń múshesi. Ol 1999 jyly Abaı aýyldyq okrýgine qarasty Júzimdik aýylynda dúnıege kelgen. Aýyldaǵy №21 Iý.Gagarın atyndaǵy JBBM-de 2017 jyly mektepti támamdaǵan. 2018-2022 jyldar aralyǵynda Á.Qýatbekov atyndaǵy Halyqtar dostyǵy ýnıversıtetinde eki shet tili mamandyǵy boıynsha bilim alǵan.
Shahnaz qazirgi tańda segiz tildi jetik meńgergen. Alty tildi bala kezden óz qyzyǵýshylyǵymen úırengen. Atap aıtsaq, qazaq, orys, ózbek, parsy, túrik, ázerbaıjan tilderi. Al aǵylshyn tili men qytaı tilin ýnıversıtet qabyrǵasynda oqyp júrip úırengen. 2023-2024 jyldary aralyǵynda «Shabyt» shyǵarmashylyq ortalyǵynda «Jastar praktıkasy» baǵdarlamasy arqyly jumys istegen.
– «Bir til bilseń – bir adamsyń, eki til bilseń – eki adamsyń» degen sóz bar. Men shet tilderin úırenýge bala kezimnen qyzyqtym. Óıtkeni til arqyly adam ózge eldiń mádenıetin, ulttyq ereksheligin tanyp-bilip, tanym kókjıegin keńeıte túsedi. Álemge áıgili ǵulama babamyz Ál-Farabı jetpiske jýyq til bilgen. Til bilýiniń arqasynda rýhanı ilim-bilim qalyptastyrǵan. Shet tilin bilgen jaqsy, árıne. Degenmen, Qazaqstanda turatyn azamattarǵa aıtarym, ultyńyzǵa, jasyńyzǵa qaramaı, memlekettik tildi úırenýge umtylyńyz degim keledi. Bul – Otanǵa, elge degen qurmettiń belgisi ári memlekettik til barlyǵymyzdy biriktiredi. Prezıdentimiz Qasym-Jomart Kemeluly Toqaev taıaýda ótken Qazaqstan halqy Assambleıasynyń sessııasynda «Men qazaq tili ýaqyt óte kele etnosaralyq qatynas tiline aınalatynyna senimdimin. Biz birtindep osyǵan kele jatyrmyz», dedi. Sondyqtan memlekettik tildi úırený – ár qazaqstandyqtyń azamattyq paryzy dep esepteımin, – deıdi polıglot qyz.
Shahnazdyń endigi armany – Qytaı elinde bilimin jetildirip, týǵan jerge oralyp, óziniń jeke oqý ortalyǵyn ashý. Mektepte ustazdyq etip, oqýshylardy bilim nárimen sýsyndatqysy keledi.
Eske sala ketsek, búgingi tańda Túrkistan oblysyndaǵy Assambleıa qurylymdarynyń uıytqy bolýymen memlekettik tildiń mártebesin kóteretin is-sharalar ótýde. Óńirdiń barlyq aýdan, qalalarynda Mádenıet jáne týrızm basqarmasyna qarasty til ortalyqtary jumys isteıdi. Ótken jyly osy kýrstarǵa 4 myńǵa jýyq adam qamtyldy. Oblystaǵy etnos ókilderiniń 92 paıyzy qazaq tilin jetik biledi, qurmet tutady.
