الماتى وبلىسى ەڭبەكشىقازاق اۋدانىنىڭ ءبىلىم بولىمىندە ەڭبەك ەتكەن زاريما قوجمامبەتوۆا استاناعا كەلىپ، ادىلدىك ىزدەپ ءجۇر. باسقارمادا باس مامان بولعان ونىڭ ۇستىنەن ءىس قوزعالىپ، سوت ۇكىمىمەن وعان 1,5 ملن تەڭگە ايىپپۇل سالىنعان، دەپ حابارلايدى «ادىرنا» ۇلتتىق پورتالى Qaz365.kz-كە سىلتەمە جاساپ.
زاريما استاناعا بىر بۋما قۇجاتتارىمەن كەلگەن. ءوزى جالعىزباستى انا. بىلتىر اكەسى قايتىس بولعان كەزدە ۇستازدار قاۋىمىنان باتا رەتىندە كاسپي گولد نومىرىنە 40 مىڭ تەڭگە تۇسكەن. زاريما سونى جەلەۋ ەتىپ، ۇستازداردى ۇيىمداستىرىپ، وزىنە جالا جابىلدى دەپ ەسەپتەيدى.
- 25 قىركۇيەك كۇنى مەنى جۇمىستان جالامەن شىعارىپ جىبەردى. مۇندا كەلگەن سەبەبىم – جۇمىسقا قايتا تۇرۋىم كەرەك. مەن ەڭبەكشىقازاق اۋدانىنىڭ ءبىلىم بولىمىندە وسى ۋاقىتقا دەيىنگى بولىپ جاتقان قىلمىستاردىڭ ءبارىن الىپ كەلدىم. سونىڭ ءبارىن كورسەتەمىن. قازىرگە دەيىن ءبىلىم بولىمىندە ءارتۇرلى قۇيتىرقى ىستەر ءجۇرىپ جاتىر. اتاپ ايتا الامىن. وبلىس اكىمى الماتى وبلىسىنىڭ اكىمى وبلىستىڭ ءبىلىم باسقارماسىنىڭ باسشىسىن قولداپ وتىر دەپ ويلايمىن. ويتكەنى سالتانات بەسپاەۆا (باسقارما باسشىسى) كەلىپ، جينالىس اشقان سايىن «اكىم ەكەۋمىز ءبىر وڭىردە ءوسىپ، ءبىر مەكتەپتە وقىعانبىز، ول كىسى مەنى قولدايدى» دەپ، قوقان-لوقىسىن ۇستازدارعا كورسەتىپ جاتادى. وسى كۇنگە دەيىن قىلمىستارىن ايتقانىم ءۇشىن ماعان جالا جابىلىپ وتىر – دەيدى ول.
زاريما قوجمامبەتوۆاعا سوت شەشىمى بويىنشا 1,5 ملن تەڭگە ايىپپۇل سالىنعان. ونىڭ ايتۋىنشا نوبد-دا (ۇستازدار بازاسى) جوق م.مۇقاتاي دەگەن ۇستاز دا وعان قارسى ارىز بەرگەن.
- ول جەردە تىركەلمەسە، ماعان قارسى ارىزدى ول قالاي جازىپ كەتتى؟ ەڭبەكشىقازاق اۋداندىق سوتىنا مۇلدە تۇسىنىكتەمەسى جوق ادام كەلدى. تۇسىنىكتەمە ودان الىنباعان. شەشىمدە سول ادامنىڭ ەسىمى جازىلىپ تۇر. مەنى سول م.مۇقاتاي دەگەن ادام ويلاندىرادى. 6 ادام ارىز جازدى دەيدى. التى ادامنىڭ تورتەۋى «زاريما بىردە-ءبىر رەت بىزدەن اقشا بوپسالادى، سۇرادى» دەپ ايتقان جوق. سوتتا ونى وزدەرى مويىندادى»، – دەيدى زاريما.
سوت ۇكىمى الماتى وبلىسى ەڭبەكشىقازاق اۋدانىنا قاراستى ەسىك قالاسىندا ورنالاسقان №2 سوتىندا شىققان. سوت قاۋلىسىندا زاريما قوجمامبەتوۆا 6 قاراشادا بىر مەكتەپتەگى تاربيەشى، مۇعالىمدەر مەن پسيحولوگتاردان، اتاپ ايتقاندا 6 700 تەڭگەدەن، جالپى 40 000 تەڭگە «زاڭسىز ماتەريالدىق سىياقىنى وزىنە تيەسىلى «Kaspi.kz» قوسىمشاسى ارقىلى «تەكسەرۋ بارىسىندا اتالعان مەكتەپتە ورىن العان كەمشىلىكتەردى انىقتامادا كورسەتپەۋى ءۇشىن العان» دەپ جازىلعان. الايدا بۇل ايىپپەن زاريما كەلىسپەيدى.
زاريما قوجمامبەتوۆانىڭ اكەسى اۋىر دەرتتەن كوز جۇمعان. زاريمانىڭ ارىپتەستەرى، اۋداندىق تاربيە ماماندارى قايتىس بولعان ادامنىڭ ۇيىنە كەلىپ، كوڭىل ايتۋمەن قاتار «از دا بولسا كومەك بولسىن» دەپ، 3000-5000 تەڭگە اراسىندا قاراجاتتاردى زاريمانىڭ كارتاسىنا اۋدارادى. بىراق باتا جاساماعان ءبىر توپ مۇعالىم انتيكورعا «ارىزدانعان».
زاريما انتيكوردىڭ وبلىستاعى وكىلىنەن تانىسۋ ءۇشىن ءىس-ماتەريالدارىن الا الماعانىن ايتىپ شاعىمداندى. سۋديا اينۇر سۇلتانوۆا زاريماعا «ءسىزدى جۇمىستان شىعارمايدى» دەگەنىمەن 24 قىركۇيەكتە جۇمىستان شىعارعان. ەندى قايتادان جۇمىسقا ورنالاسۋ ۇشىن زاريما وقۋ-اعارتۋ ءمينيسترى عاني بەيسەمباەۆپەن كەزدەسىپ، سونىڭ الدىندا ماسەلە كوتەرگىسى كەلەدى.
