قازاقستان مەن وڭتۇستىك كورەيا ەلدەرى اراسىنداعى اۋە رەيستەرىن ارتتىرۋ تۋرالى شەشىم قابىلداندى، دەپ حابارلايدى “ادىرنا” ۇلتتىق پورتالى قر كولىك مينيسترلىگىنىڭ ءباسپاسوز قىزمەتىنە سىلتەپ.
«الماتىدا قازاقستان رەسپۋبليكاسى مەن كورەيا رەسپۋبليكاسىنىڭ اۆياتسيالىق بيلىگى اراسىندا ەكىجاقتى كەلىسسوزدەر ءوتتى. قازاقستان رەسپۋبليكاسى كولىك مينيسترلىگى ازاماتتىق اۆياتسيا كوميتەتىنىڭ توراعاسى سالتانات تومپيەۆا كورەيا رەسپۋبليكاسىنىڭ ازاماتتىق اۆياتسيا باسقارماسىنىڭ باس ديرەكتورى يونگ كۋك كيممەن كەزدەسۋ وتكىزدى»، - دەلىنگەن حابارلامادا.
تاراپتار ەلدەر اراسىنداعى رۇقسات ەتىلگەن رەيستەردىڭ جالپى سانىن اپتاسىنا 10-نان 42-گە دەيىن ۇلعايتۋعا كەلىستى.
سونداي-اق اپتاسىنا 40 جۇك رەيسىن، ونىڭ ىشىندە «اۋە ەركىندىگىنىڭ» بەسىنشى دارەجەسىن پايدالانۋ قۇقىعىن بەرۋ تۋرالى كەلىسىمگە قول جەتكىزىلدى.
كەلىسسوزدەر بارىسىندا باعىتتار مەن بەلگىلەنگەن تاسىمالداۋشىلار سانىنا قويىلعان شەكتەۋلەر الىنىپ تاستالدى، بۇل باسەكەلەستىكتى ارتتىرىپ، ەلدەر اراسىنداعى ۇشۋ گەوگرافياسىن كەڭەيتەدى.
تاراپتار اۋە تاسىمالداۋشىلارىنىڭ ەكى ەلدىڭ استانالارى اراسىندا تىكەلەي اۋە قاتىناسىن ورناتۋ نيەتتەرىن قولدادى.
